Facebook, Gmail і Twitter могуць «перакрыць» у Расіі, калі яны не зарэгіструюцца ў РФ. Раскамнагляд ужо накіраваў адпаведныя паведамленні гэтым амерыканскім сэрвісам.
Неабходнасць рэгістравацца ў Расіі прапісаная папраўкамі ў законы «Аб сувязі», «Аб інфарматызацыі інфармацыйных тэхналогіях і аб абароне інфармацыі» і КаАП.
У іх, у прыватнасці гаворыцца пра тое, што сайты і сістэмы, якія забяспечваюць прыём, перадачу, дастаўку паведамленняў у Інтэрнэце, павінны зарэгістравацца ў Раскамнаглядзе і на працягу паўгода захоўваць на тэрыторыі Расіі ўсю прынятую інфармацыю — будзь яна ў тэкставым, графічным, гукавым і любым іншым выглядзе.
Арганізацыям, якія не выконваюць патрабаванне, пагражае штраф да паўмільёна рублёў і пападанне ў «чорны спіс».
«Укантакце», сэрвісы «Яндэкса» і Mail.Ru ужо ўключаны ў рэестр, «Хабрахабр» — у працэсе рэгістрацыі», — распавёў намеснік кіраўніка Раскамнагляду Максім Ксянзоў.
Ён удакладніў, што парталам, якія яшчэ не пачалі працэс рэгістрацыі, накіраваны паведамленні аб неабходнасці яе правесці.
«Мы з імі вядзем кансультацыі і пакуль спецыяльна не прыспешваем», — кажа ён. Facebook, Gmail і Twitter павінны прыняць рашэнне з нагоды размяшчэння сваіх дата-цэнтраў у Расіі.
Раней расійскія СМІ паведамілі пра намер расейскіх уладаў адключыць Рунэт ад глабальнага сеціва.
Аднак прэс-сакратар Пуціна Дзмітрый Пяскоў пазней растлумачыў, што расейскія ўлады не разглядаюць варыянт адключэння Рунэту ад сусветнай сеткі Інтэрнэт. Айчынныя спецыялісты, па словах прэс-сакратара, хочуць распрацаваць ахоўныя меры на выпадак надзвычайнага здарэння, бо заходнія партнёры не заўсёды бываюць надзейныя.
