Выканаўца рыхтуецца да першага легальнага сольнага канцэрта пасля перапынку ў тры гады.
Мінгарвыканкам выдаў гастрольнае пасведчанне на канцэрт Змітра Вайцюшкевіча, які плануецца зрабіць 29 кастрычніка ў ДК імя Шарко ў Мінску.
Пра гэта выканаўца паведаміў парталу Tuzin.fm. «Безумоўна, радуюся магчамасці зноў з'яўляцца перад публікаю, рыхтую з гэтай нагоды разам з WZ-orkiestra праграму з найлепшых песень, а калі квіткі добра пойдуць, дык заявім яшчэ адзін канцэрт з прэзэнтацыяй шансон-праграмы», – зазначыў Зміцер.
Апошні афіцыйны канцэрт Вайцюшкевіч даў 8 сакавіка 2011, пасля чаго апынуўся ў «чорным спісе».
Упершыню за тры гады выканаўца легальна выступіў на прэзентацыі праекту «Re:Песняры». Гэты яго выступ узгадняўся на ўзроўні адміністрацыі прэзідэнта.