Праект новага генплана развіцця Мінска мае патрэбу ў сур'ёзнай дапрацоўцы, заявіў на нарадзе па пытаннях карэкціроўкі гэтага дакумента памочнік прэзідэнта — галоўны інспектар па горадзе Мінску Аляксандр Якабсон.
«Новы генплан развіцця сталіцы мае патрэбу ў сур'ёзнай дапрацоўцы. Неабходна абмеркаванне ўсімі зацікаўленымі бакамі: кіраўніцтвам горада, прадстаўнікамі камітэта эканомікі Мінгарвыканкама, БелНДІ горадабудаўніцтва і іншых службаў», — сказаў Аляксандр Якабсон. «Цяпер адзінства ў іх пазіцыях няма», — дадаў ён.
Яго словы падтрымаў старшыня камітэта будаўніцтва і інвестыцый Мінгарвыканкама Фёдар Рымашэўскі. Ён нагадаў, што ў сталіцы плануецца скараціць аб'ёмы будаўніцтва жылля, паколькі свабодных пляцовак практычна не засталося.
«У 2015 годзе ў горадзе плануецца пабудаваць амаль 900 тыс. кв.м жылля, да 2017 года выйсці на 500 тыс. кв.м у год. Сёння найбольш перспектыўным для шматпавярховай забудовы з'яўляецца жылы комплекс «Нотынгем». Там плануецца пабудаваць 1,2 млн. кв.м жылля. З іх 900 тыс. кв.м пабудуюць за кошт бюджэту горада, 300 тыс. кв.м аддадзена прыватнаму забудоўшчыку. Дакументы ўжо знаходзяцца на экспертызе», — сказаў ён.
На нарадзе супрацоўнікі ўнітарнага прадпрыемства «Мінскграда» прадставілі свае прапановы па карэкціроўцы генплана развіцця сталіцы. У прыватнасці, яны разглядалі магчымасці павелічэння аб'ёмаў будаўніцтва жылля ў Мінску, асваення часткі тэрыторыі Шчомысліцы, Зялёнага Бора. Таксама спецыялісты расказалі аб планаваным завяршэнні фарміравання раёнаў масавага жыллёвага будаўніцтва Лебядзіны, Каменная Горка, Дамброўка, Мядзвежына, Сухарава і Лошыца.
Праект карэктуры генеральнага плана развіцця Мінска будзе прадстаўлены на разгляд кіраўніцтва рэспублікі да канца бягучага года.
