«У кулёчку на кухні ляжыць чорны заварны хлеб Жлобінскага завода. Ляжыць цягам шасці дзён — і яшчэ добры. Вельмі падобны на смак чорны заварны хлеб, але ад Тульскага хлебакамбіната ляжыць не больш за тры дні і зацвітае. Адкуль такая розніца? Ніякіх кансервантаў у складзе жлобінскага хлеба няма, але і ў складзе тульскага іх таксама няма. Дык чаму першы ляжыць доўга і не псуецца, а другі праз тры дні ўжо на сметніку?» — запытаўся наш чытач з Тулы (Расія) Аляксей Арцёмаў.
Яму адказвае адзін з найлепшых пекараў краіны, Кастусь Ларкоў з Верхнядзвінска (Віцебская вобласць): «Значыць, санітарны стан на Тульскім хлебакамбінаце значна горшы ў параўнанні са жлобінскім. Любы хлеб з печы выходзіць стэрыльным. Грыбы цвілі трапляюць на яго праз тару, рукі пакавальніка, паветра. Тэхналогія выпечкі тут ні пры чым!
Тэхналагічны ланцужок прадугледжвае астыванне хлеба перад нарэзваннем (2—3 гадзіны), вось у гэты момант цвіль і трапляе на хлеб, а потым у спрыяльных умовах, а цэлафанавая ўпакоўка — гэта вельмі спрыяльныя ўмовы, грыбы цвілі актыўна растуць».
Таму, сябры, заўважайце, які хлеб доўга не цвіце, такі і купляйце.
