Нягледзячы на складаныя ўмовы 2014 года, у Беларусі ўдалося дасягнуць адноснай збалансаванасці эканомікі, заявіў віцэ-прэм'ер Пятро Пракаповіч, выступаючы 19 снежня на сумесным пасяджэнні абедзвюх палат Нацыянальнага сходу.
«На жаль, сёлета нам даводзілася працаваць ва ўмовах, якія не маглі прадбачыць пры працы над прагнознымі паказчыкамі. Гэта, па-першае, падзеі ва Украіне. Не маглі мы прадбачыць і тое, што адбудзецца ў нашага галоўнага партнёра — Расійскай Федэрацыі. Таму даводзілася карэктаваць прагнозныя паказчыкі, прыстасоўвацца да новых умоў», — сказаў Пракаповіч.
Урэшце, дадаў ён, не толькі знешнія фактары не дазволілі выканаць прагнозныя паказчыкі: «Паўплывалі і ўнутраныя фактары — што мы не ў дастатковай ступені павысілі канкурэнтаздольнасць нашай прадукцыі на ўнутраным і знешнім рынках».
Тым не менш, лічыць віцэ-прэм'ер, галоўная задача ў 2014 годзе выкананая: рост рэальных даходаў насельніцтва за 11 месяцаў склаў 101,7%.
Адмоўным фактарам Пракаповіч назваў тое, што пытанні стабілізацыі вырашаліся не толькі за кошт унутраных рэсурсаў, але і праз рэструктурызацыю знешняга доўгу.
У цэлым жа вынікі года, на думку віцэ-прэм'ера, можна лічыць станоўчымі.
