Аляксандар Мілінкевіч |
Лідэр руху «За свабоду» Аляксандар Мілінкевіч мае намер ладзіць афіцыйна дазволеныя сустрэчы з грамадзянамі Беларусі. Цяпер мясцовыя актывісты будуць складваць адмысловую просьбу аб дазволе на сустрэчу зь Мілінкевічам. Такая ідэя ў актывістаў руху «За свабоду» зьявілася пасьля таго, як шэраг дзеячоў былі пакараныя за нібыта несанкцыянаваныя сходы з удзелам палітыка.
Грамадзяне будуць зазначаць, што мэта сустрэчы — гэта абмеркаваньне эканамічных і сацыяльных праблемаў у Беларусі. Сам Аляксандар Мілінкевіч перакананы, што сацыяльная тэматыка сустрэчаў будзе прыцягваць значную колькасьць людзей. А паплечнікі палітыка зазначаюць, што ўлады ня будуць мець прычынаў, каб ня даць згоды на сустрэчу зь Мілінкевічам.
Першыя сустрэчы палітыка з грамадзянамі пройдуць на пачатку лютага ў Маладэчне й Жодзіна.