З прэзідэнтам Грузіі, фота з фэйсбука Георгія Маргвелашвілі
Нікому сёння не дазволена і не пад сілу парушыць адзінства праваслаўных народаў. Аб гэтым заявіў Аляксандр Лукашэнка на сустрэчы з Каталікосам-Патрыярхам усёй Грузіі, Архіепіскапам Мцхецкім і Тбіліскім, Мітрапалітам Піцундскім і Сухум-Абхазскім Іліёй II, паведамляе БелТА.
«Нашы народы заўсёды былі блізкія, і ваш боль, з якім вы сказалі аб цэласнасці, аб сваім народзе, нам блізкі», — адзначыў кіраўнік беларускай дзяржавы.
«Мы будзем рабіць усё, каб грузінскі народ як мага хутчэй перагарнуў старонкі нядаўняй гісторыі і забыў гэтыя дні. Сумна, што ў нас, у праваслаўных народаў, гэтыя старонкі з'явіліся», — сказаў Лукашэнка.
Лукашэнка звярнуў увагу на тое, што фундаментам любога супрацоўніцтва з'яўляецца эканоміка.
«І калі мы сёння маем тавараабарот ўсяго $65 млн - смешную лічбу, тавараабарот сярэдніх бізнесменаў, то за гэтыя два дні мы дасягнулі дамоўленасцей з вашымі прадпрымальнікамі на $200 млн, і пад канкрэтныя дамоўленасці заключаны кантракты», - дадаў кіраўнік беларускай дзяржавы. «Мы селі за стол перагавораў і дамовіліся, што мы павінны дасягнуць на працягу бягучага і будучага года гэтага тавараабароту, і значыць, і дабрабыту двух народаў», - адзначыў ён.
«Вы мне сказалі толькі што сам-насам нечакана і ад душы: «Нарэшце мы вас дачакаліся».
Дзякуй вам за тое, што вы чакалі не прэзідэнта Лукашэнку, а прадстаўніка беларускага народа — самага добрага, можна сказаць, святога народа, міралюбнага, маючага самыя высокія добрыя пачуцці да братоў-грузін», - падкрэсліў ён.
