Паліцэйскі шокер у форме пісталета. Фота з сайта policestateusa.com
Мэр мястэчка Ван Метэр (штат Аёва, ЗША) Джэйк Андэрсан і старшыня гарадской рады Боб Лэйсі пагадзіліся стаць ахвярамі стрэлу з электрашокера дзеля пакупкі новага аўто для паліцыі, піша The Des Moines Register. Стрэліць дадуць 18 ліпеня падчас танцавальнай вечарыны пажарнага дэпартаменту мястэчка.
Таго, хто зможа стрэліць у чыноўнікаў, абяруць з дапамогай латарэі. Адзін латарэйны квіток каштуе 5 даляраў, набываць можна неабмежаваную колькасць квіткоў. Хто менавіта стане ахвярай, мэр ці старшыня рады, — абяруць на народным галасаванні.
Стрэл з паліцэйскага шокера звычайна не нясе шкоды здароўю і можа забіць хіба хворага на сэрца пры трапленні наўпрост у сэрца. «Многія афіцэры вам скажуць, што хутчэй пагадзіліся бы на электрашок, чым на пярцовы балончык. Эфект нядоўгі, не пячэ», — патлумачыў Біл Дагарт, мясцовы афіцэр паліцыі, які сам ніколі не быў мішэнню паліцэйскага шокера.
Грошы, сабраныя на латарэі, плануецца пусціць на патрэбы паліцыі, якой трэба набыць другую машыну, дарожны радар, а таксама расшырыць штат часовых супрацоўнікаў і рэзервістаў, які на сёння налічвае шэсць чалавек. Таксама гарадская паліцыя збіраецца набыць больш нелетальных электрашокераў.
Сцвярджаецца, што ідэя прыйшла падчас абмеркавання бюджэту паліцыі, а мэр і старшыня рады пагадзіліся на электрашок дабраахвотна. У абодвух раней не стралялі з паліцэйскага шокера.
Патрэба ў дадатковых грошах не выкліканая ростам злачыннасці мястэчка з насельніцтвам у 1100 чалавек. Ван Метэр збіраецца прывабіць кампаніі кшталту Microsoft ці Facebook да размяшчэння дата-цэнтраў, а такія кампаніі маюць пэўныя патрабаванні да паліцыі і пажарных службаў.
![Клас Клас](https://d3rebrwga7u6ai.cloudfront.net/images/reactions/reaction-like.png)
![Панылы сорам Панылы сорам](https://d3rebrwga7u6ai.cloudfront.net/images/reactions/reaction-facepalm.png)
![Ха-ха Ха-ха](https://d3rebrwga7u6ai.cloudfront.net/images/reactions/reaction-smile.png)
![Ого Ого](https://d3rebrwga7u6ai.cloudfront.net/images/reactions/reaction-omg.png)
![Сумна Сумна](https://d3rebrwga7u6ai.cloudfront.net/images/reactions/reaction-sad.png)
![Абуральна Абуральна](https://d3rebrwga7u6ai.cloudfront.net/images/reactions/reaction-anger.png)