У сувязі з пачашчэннем у Тунісе выпадкаў тэрарыстычных актаў, накіраваных супраць замежных турыстаў, Міністэрства спорту і турызму рэкамендуе беларусам устрымацца ад турыстычных падарожжаў у гэтую краіну.
«Разам з тым турыстам, якія знаходзяцца на адпачынку ў Тунісе, рэкамендуецца прытрымлівацца маршруту турыстычнага падарожжа ў адпаведнасці з набытым турам і выконваць дакладныя ўказанні кіраўніка турыстычнай групы або гіда прымаючага боку. Пры ўзнікненні сітуацыі непераадольнай сілы не панікаваць і кіравацца дакладным інструктажам свайго кіраўніка», — гаворыцца ў апублікаваным 2 ліпеня паведамленні ведамства.
Пры намеры пакінуць краіну турыстам неабходна звярнуцца да кіраўніка турыстычнай групы з просьбай звязацца па гэтым пытанні з накіроўваючай турыстычнай кампаніяй.
Міністэрства нагадвае, што, у адпаведнасці з заканадаўствам, турысты, якія заключылі дагавор аказання турыстычных паслуг і жадаюць захаваць заплачаныя за тур грошы, маюць права звярнуцца ў сваю турыстычную кампанію з просьбай перабраніраваць тур на іншую дату або іншую краіну.
Калі перабраніраваць тур не ўяўляецца магчымым, турысты маюць права адмовіцца ад турыстычнага падарожжа ў Туніс, для чаго неабходна звярнуцца ў туркампанію, з якой заключаны дагавор, з просьбай скасаваць дагавор і падаць заяву аб вяртанні кошту тура, адзначаецца ў паведамленні.
«Улічваючы, што да падарожжа можа заставацца мала часу, турыстычныя кампаніі могуць утрымаць з турыстаў расходы, звязаныя з арганізацыяй тураў. Пры гэтым фактычна панесеныя расходы павінны пацвярджацца дакументальна і адлюстроўваць рэальныя расходы турыстычных кампаній, а не проста суму расходаў або зараней зафіксаваны ў дагаворы працэнт ад кошту тура», — пракаментавалі ў міністэрстве.
Пры нязгодзе турыста з сумай фактычна панесеных расходаў, выстаўленых турыстычнай кампаніяй, турыст мае права іх аспрэчыць, у тым ліку ў судовым парадку.
Пры паступленні зваротаў турыстаў Мінспорту рэкамендуе турыстычным кампаніям кіравацца нормамі закона Беларусі «Аб турызме», а таксама раздзела 9 Правілаў аказання турыстычных паслуг, зацверджаных пастановай Савета міністраў Беларусі ад 12 лістапада 2014 года № 1064.
Дадатковую кансультацыю, у тым ліку па прававых пытаннях, турысты і турыстычныя кампаніі могуць атрымаць у спецыялістаў дэпартамента па турызме Міністэрства спорту і турызму.
Нагадаем, раней МЗС рэкамендавала беларусам выконваць у Тунісе максімальна магчымыя меры перасцярогі і ўстрымацца ад наведвання месцаў масавага збору людзей.
