Аварыя здарылася з 6-м вагонам электрапоезда рэгіянальных ліній «Маладзечна-Мінск», што выйшаў з Маладзечна а 15.46.
У вагоне стала назіраўся пах гарэлай пластмасы.
«Усе ёрзалі, круцілі галовамі, цягнулі носам, але, відаць, як гэта часта бывае з беларусамі, думалі: а можа, так і трэба? А можа, пранясе? — піша ў сваім фэйсбуку Наталка Бабіна, што якраз апынулася ў тым вагоне. Выратавала сітуацыю, паводле яе словаў, журналістка Ганна Севярынец, сястра палітыка-хрысціяніна. — «Ганна са спакойным выразам твару прайшла з сярэдзіны вагона да кропкі сувязі з машыністам і сказала: «У шостым вагоне вельмі пахне паленай праводкай. Калі ласка, дапамажыце разабрацца, у чым справа».
Хутка прыбег памочнік машыніста, і на прыпынку «Мінскае мора» ўсіх папрасілі выйсці з вагона. З электрычных шчытоў на той час ужо валіў дым.
Вагон быў запоўнены пад завязку. Але — трэба аддаць належнае — людзі вельмі спакойна выйшлі.
Праз нейкі час нам прапанавалі сядаць у іншыя вагоны, і электрычка пацягнулася далей.
Калі б не Ганна, хто знае, чым гэта магло абярнуцца», — адзначае Бабіна.
