Ліпецкая кандытарская фабрыка Roshen, якая належыць прэзідэнту Украіны Пятру Парашэнку, выйграла суд ў Федэральнай падатковай службы Расіі.
Паводле дадзеных інфармагенцтваў, абласны арбітраж прызнаў незаконным рашэнне ФНС налічыць фабрыцы 35 млн рублёў пеняў і штрафаў. Акрамя таго, суд скасаваў рашэнне падаткавікоў не кампенсаваць фабрыцы 26 млн рублёў ПДВ.
Прычыны прыняцця такога рашэння невядомыя, паколькі апублікаваная толькі яго рэзалютыўная частка. Матывіроўка будзе дадзеная пазней. У бакоў ёсць месяц на абскарджанне прынятага арбітражам рашэння.
Абодва абскарджаныя фабрыкай рашэнні падаткавікі прынялі па выніках апошняга квартала мінулага года. Прэтэнзіі ў ФНС выклікаў дагавор фабрыкі з будаўнічай кампаніяй «Металімпрэс».
Падаткавікі лічылі, што кампанія выконвала работы па завышанай цане, што дазволіла фабрыцы атрымаць неабгрунтаваную падатковую выгаду за кошт завышэння падатковых вылікаў па ПДВ.
Акрамя ФНС, прэтэнзіі да фабрыкі выказваў Следчы камітэт Расіі. Яго прадстаўнікі сцвярджаюць, што за кошт падобнай схемы Roshen ў 2012 і 2013 гадах скраў з расійскага бюджэту 180 млн рублёў.
У дачыненні да фабрыкі была распачатая справа аб махлярстве. На прадпрыемстве адбыліся ператрусы. Акрамя таго, суд арыштаваў маёмасць Roshen агульным коштам каля 2 млрд рублёў.
Ліпецкая фабрыка Roshen з'яўляецца расійскім даччыным прадпрыемствам аднайменнага ўкраінскага канцэрна, заснаванага Пятром Парашэнкам яшчэ да пачатку яго палітычнай кар'еры.
У пачатку чэрвеня прэзідэнт паабяцаў прадаць свой бізнэс, каб пазбегнуць канфлікту інтарэсаў.
