Руская праваслаўная царква звярнулася да ўладаў Санкт-Пецярбурга з просьбай перадаць ёй у бязвыплатнае карыстанне Ісакіеўскі сабор, які з'яўляецца цяпер музеем-помнікам.
wikimedia.org
Гэта пацвердзіла кіраўніца сектара камунікацый пры інфармацыйным аддзеле Санкт-Пецярбургскай епархіі РПЦ Наталля Радаманава.
Дырэктар музея-помніка «Ісакіеўскі сабор» Мікалай Бураў сказаў, што быў у адпачынку і не ведаў пра гэты крок царквы.
Бураў сказаў, што «перадача РПЦ можа негатыўна адбіцца на стане Ісакіеўскага сабора»: рэзка замарудзяцца тэмпы дарагой рэстаўрацыі, сабор стане менш даступным для гараджан і турыстаў.
Зварот епархіі знаходзіцца на разглядзе ў аддзеле па сувязях з рэлігійнымі арганізацыямі адміністрацыі Санкт-Пецярбурга, напісаў у «Твітары» прэс-сакратар губернатара Георгія Палтаўчанкі Андрэй Кібітаў. Паводле яго слоў, рашэнне пакуль не прынятае.
Пытанне перадачы Ісакіеўскага сабора вывучае таксама камітэт па культуры Санкт-Пецярбурга, сказаў яго кіраўнік Канстанцін Сухенка.
Старшыня камісіі па культуры Заканадаўчага сходу горада Максім Рэзнік, які раніцай у чацвер паведаміў пра запыт РПЦ, мае намер ініцыяваць разгляд пытання ў гарадскім парламенце.
Расейскія СМІ паведамлялі, што РПЦ прэтэндуе і на іншыя вядомыя культавыя будынкі Санкт-Пецярбурга, у прыватнасці, Смольны сабор і храм Спаса на Крыві.
