Спецслужбы Вялікабрытаніі і Францыі будуць весці абмен інфармацыяй для барацьбы з тэрарыстычнай пагрозай. Аб гэтым сёння ў Парыжы заявіў прэм'ер-міністр Злучанага Каралеўства Дэвід Кэмеран пасля перагавораў з прэзідэнтам Францыі Франсуа Аляндам.
«Мы дамовіліся павысіць узаемадзеянне па пытанні абмену інфармацыяй з Францыяй і нашымі еўрапейскімі партнёрамі», - сказаў Дэвід Кэмеран.
Таксама стала вядома, што Францыя мае намер нарошчваць паветраныя ўдары па групоўцы «Ісламская дзяржава» (ІД) у Сірыі. Аб гэтым паведаміў сёння прэзідэнт Франсуа Алянд па выніках перагавораў з Дэвідам Кэмеранам.
Ён нагадаў, што да берагоў Сірыі прыбыў французскі авіяносец «Шарль дэ Голь». На борце авіяносца знаходзіцца 18 самалётаў «Рафаль» і 8 самалётаў «Супер-этандар», іншая баявая і разведвальная авіяцыйная тэхніка. Раней у рэгіёне дзейнічалі 12 самалётаў французскіх ВПС (6 «Міраж-2000» і 6 «Рафаль»), дыслацыраваныя на базе ў Аб'яднаных Арабскіх Эміратах. «Мэта міжнароднай супольнасці — знішчэнне ІД», — заявіў францускі лідар.
У сваю чаргу кіраўнік брытанскага ўрада Дэвід Кэмеран заявіў, што Вялікабрытанія павінна далучыцца да паветраных удараў па «Ісламскай дзяржаве». Брытанскі прэм'ер запэўніў, што афіцыйны Лондан падтрымлівае намаганні Парыжа ў барацьбе супраць ісламістаў і ўдары Францыі па пазіцыях ІД у Сірыі. «Я перакананы, што Вялікабрытанія павінна зрабіць тое ж самае», — заявіў Дэвід Кэмеран. Ён паведаміў, што ў сярэдзіне тыдня прадставіць план дзеянняў на Блізкім Усходзе ў парламенце Вялікабрытаніі.
Дэвід Кэмеран дадаў, што Вялікабрытанія прадаставіла ў распараджэнне Францыі сваю ваенную базу на Кіпры для барацьбы з тэрарыстамі ІД.
