 Андрэй Саньнікаў |
Апошнім днямі пачалі цыркуляваць чуткі, што адзін з каардынатараў «Хартыі-97» Андрэй Саньнікаў хоча ўзначаліць Партыю БНФ і стане яе вылучэнцам на наступных прэзыдэнцкіх выбарах. Часткова гэта чуткі пацьвярджаюць самі партыйцы.
Сёньняшні старшыня БНФ Лявон Баршчэўскі кажа, што «гаварыць пра новага кіраўніка арганізацыі пакуль нясвоечасова». «Адзінае, я ведаю тое, што Саньнікаў сапраўды ўзяў блянк для ўступленьня ў Партыю. Але гэта ўсё моцна перабольшанае», – кажа Баршчэўскі.
Намесьнік старшыні Партыі БНФ Аляксей Янукевіч канкрэтызуе: «Адкуль зьявіліся чуткі, што Саньнікаў хоча стаць старшынём Партыі, я ня ведаю. Гэта ўсё ж больш домыслы, чым рэальная пэрспэктыва. Што да вылучэньня Саньнікава кандыдатам у прэзыдэнты ад БНФ, то гэта досыць рэальна. Наколькі я ведаю, бліжэйшым часам ён зьбіраецца ўступіць у БНФ і ўнесьці сваю кандыдатуру ў сьпіс вылучэнцаў на прэзыджнцкія выбары. Як я лічу, чым больш кандыдатаў, тым лепш. Паглядзім, ці падтрымаюць Саньнікава нашы партыйцы».
Нагадаем, што раней пра жаданьне балятавацца ў прэзыдэнты ад Партыі БНФ заявілі намесьнік старшыні Алесь Міхалевіч і прафэсар Юры Хадыка.
«Я беспартыйны чалавек, нікуды ўступаць не зьбіраюся. А плёткі камэнтаваць не хачу», — сказаў «НН» сп.Саньнікаў.
Наколькі нам стала вядома, сустрэчы між Баршчэўскім і Саньнікавым усё ж адбываліся. Толькі незразумела, ці далі яны жаданы вынік. У любым выпадку ўсё гэта можа праясьніцца яшчэ летам, калі адбудзецца пазачарговы зьезд БНФ для вылучэньня кандыдатаў на парлямэнцкія выбары.
* * *
Андрэй Саньнікаў нарадзіўся ў Менску ў 1954 г. Скончыў Менскі дзяржаўны лінгвістычны ўнівэрсытэт. У 1982—1985 г. працаваў у Сакратарыяце ААН у Нью-Ёрку. Пасьля сканчэньня Маскоўскай дыпляматычнай акадэміі ў 1989 г. — у Міністэрстве замежных справаў Беларусі. З 1993 па 1995 г. працаваў дарадцам місіі Беларусі ў Жэнэве. У 1995 г. прызначаны намесьнікам міністра замежных справаў Беларусі. Зь лістапада 1996 г. стаўся міжнародным каардынатарам грамадзкай ініцыятывы “Хартыя’97”. Мае дыпляматычны ранг пасла. Жанаты, мае сына.
