«Калі ты чуеш пра празрыстыя скрынкі, то не зразумела, што там — бюлетэнь ці туалетная папера. Ну, туалетную паперу яшчэ адрозьніш, ці які‑небудзь іншы лісток паперы. Цалкам магчыма, што гэта не бюлетэнь увогуле можа там валяцца і ты абсалютна не выявіш у празрыстай скрыні — а што там увогуле знаходзіцца. Таму самае галоўнае, што пасьля са скрынкі будзе выкладзенае на стол» — пракамэнтавала старшыня ЦВК магчымасьць усталяваньня на выбарчых участках празрыстых скрыняў з мэтай пазьбегнуць фальсыфікацыяў выбарчых бюлетэняў.
Пры гэтым яна адзначыла, што закон не забараняе выкарыстаньня такіх скрыняў, іх выкарыстаньне ёсьць добраахвотнай справай выбарчых камісіяў. Каб пабачыць празрыстыя скрыні, Лідзія Ярмошына параіла наведаць у дзень выбараў некаторыя менскія ўнівэрсытэты, якія дазволілі сабе выдаткаваць на такія скрыні каля 100 даляраў за штуку.
Л. Ярмошына адзначыла, што яе асабістым пажаданьнем было ўключэньне ў кожную акруговую камісію хоць бы аднаго прадстаўніка апазыцыі. І распавяла, што ў Магілёве, куды яна наведалася, у камісію патрапілі прадстаўнік калякінскіх камуністаў і кіраўнік абласнога аддзяленьня грамадзкага аб’яднаньня БНФ «Адраджэньне». Абодвух яна ахарактарызавала, як «найбольш цікавых, яскравых, харызматычных» прадстаўнікоў мясцовай апазыцыі.
Пытаньне, чаму ж яе пажаданьне пра ўключэньне хоць бы па адным прадстаўнік ад дэмсілаў было выкананае зусім нязначна, чыноўніца пакінула без камэнтару.
 |
