На мінскай сцяне, якая праславілася партрэтам экс-міністра працы Марыяны Шчоткінай, з'явілася новае графіці — 12 фігурак старшыні Савета Рэспублікі Міхаіла Мясніковіча. Ніякага подпісу пад імі няма.
Нагадаем, плот у адным з мінскіх дворыкаў набыў вядомасць, калі на ім з'явілася выява экс-міністра працы Марыяны Шчоткінай з подпісам «Гэта я аўтар падатку на беспрацоўных». Партрэт правісеў некалькі гадзін, пакуль яго не знішчылі работнікі ЖЭСа.
Неўзабаве на тым самым месцы невядомым графіцістам быў зроблены надпіс «Вы ж самі ўсё разумееце». Яго існаванне таксама было нядоўгім. Колькі праіснуюць «мясніковічы», пакуль сказаць складана. Дарэчы, Шчоткіна зараз з'яўляецца намесніцай Мясніковіча ў Савеце Рэспублікі.
Але сёння раніцай выява Мясніковіча з'явілася таксама на вуліцы Дружнай.
