Школа ў Ваўкавыску
Сябры Саюзу палякаў Беларусі накіравалі на адрас Лукашэнкі каля 6 тысяч подпісаў у абарону польскіх школаў у Горадні і Ваўкавыску.
Паводле сябра Саюза палякаў Веслава Кеўляка, дзеці якога навучаюцца ў школе з польскай мовай навучаньня ў Горадні, падставай для напісаньня ліста да Лукашэнкі сталі зьмены, якія, як чакаецца, будуць у ліпені ўнесеныя ў заканадаўства аб адукацыі ў Беларусі. Кеўляк кажа, што бацькі дзетак, якія навучаюцца ў дзьвюх польскіх школах, у Горадні і Ваўкавыску, устрывожыліся навіной і пачалі пісаць лісты ў розныя інстанцыі.
— Наколькі мы разумеем, зьмены абавяжуць усіх вучняў Беларусі здаваць выпускныя іспыты абавязкова на адной зь дзяржаўных моваў. І тады ў нашых школах губляецца сэнс выкладаньня асноўных прадметаў: матэматыкі, фізыкі, хіміі, іншых на польскай мове, калі дзеці павінны будуць абавязкова здаваць выпускны экзамэн, як мы мяркуем, па-расейску.
Спадар Кеўляк распавядае, што і ён, і іншыя бацькі, чые дзеці навучаюцца ў польскіх школах, не разумеюць лёгікі ўладаў, бо, маўляў, адукацыя ў гэтых школах на даволі высокім узроўні, ахвотнікаў навучацца там шмат, большасьць выпускнікоў школаў паступаюць у вышэйшыя навучальныя установы, прычым пераважна ў Польшчы.
— Мы ўсе ведаем, што школы збудаваныя на грошы польскіх падаткаплацельшчыкаў. Дзеці з задавальненьнем там навучаюцца, і навошта рабіць для іх такі стрэс? Нядаўна ў польскай школе ў Горадні з бацькамі сустракалася прадстаўніца Міністэрства адукацыі Беларусі Ірына Каржова. Дык яна нам проста заявіла, што ў Беларусі ўсе дзеці будуць здаваць выпускныя экзамэны на адной зь дзяржаўных моваў, хоць папраўкі ў заканадаўства яшчэ не прынятыя.
Старшыня непрызнанага беларускімі ўладамі Саюза палякаў Анжаліка Борыс сама насіла на пошту адсылаць Лукашэнку подпісы людзей з патрабаваньнем абараніць польскія школы ў Горадні і Ваўкавыску. Яна кажа, што подпісы зьбіралі на працягу паўтара месяца.
Паводле яе, беларускія ўлады ў 1996 годзе, калі адкрывалася першая польская школа ў Горадні, збудаваная за грошы польскага ўраду, абяцалі збудаваць другую польскую школу ў Занёманскай частцы гораду за грошы беларускай дзяржавы, але цяпер, маўляў, існуе пагроза, што наагул не застанецца ніводнай польскай школы. Паводле Борыс, рашэньне аб статусе польскіх школаў шмат у чым будзе залежаць ад палітычнай каньюнктуры.
— Відавочна, што папраўкі ў заканадаўства аб адукацыі скасуюць польскія школы. Людзей гэта вельмі хвалюе, і мы за даволі кароткі тэрмін сабралі амаль 6 тысяч подпісаў. Маглі б сабраць і болей, але сьпяшаліся даслаць іх Лукашэнку, каб ён адчуў рэакцыю мясцовых людзей на гэта. Але мы ў той самы час не сумняваемся, што рашэньне аб статусе нашых школаў будзе залежаць ад многіх палітычных чыньнікаў.
У Гарадзенскім абласным Упраўленьні адукацыі намесьніца начальніка Галіна Курганская сказала Свабодзе, што пакуль нічога канкрэтнага ня можа патлумачыць наконт таго, якім будзе статус польскіх школаў у Горадні і Ваўкавыску.
— Мы ведаем, што бацькі дасылалі лісты і ў Міністэрства адукацыі, і ў Адміністрацыю прэзыдэнта. І яны маюць права на гэта. Але ўсё будзе вырашаць парлямэнт.
Школы з польскай мовай навучаньня ў Горадні і Ваўкавыску існуюць больш за 20 гадоў.
