Футбалісты моладзевай зборнай Венесуэлы танцуюць на стадыёне. Іх сустрэлі як нацыянальных герояў. Фота Ройтэрз.
Цырымонія ўшанавання моладзевай зборнай Венесуэлы па футболе ператварылася ў антыўрадавую дэманстрацыю.
Y va a caer, y va a caer, este gobierno va a caer! — «Падзе, падзе, урад падзе!» — скандавалі людзі папулярны слоган з маніфестацый, пішуць венесуэльскія незалежныя СМІ.
Каля 20 тысяч чалавек сабраліся на Алімпійскім стадыёне Каракаса на павітанне моладзевай зборнай да 20 гадоў, якая ўпершыню ў гісторыі краіны выйшла ў фінал сусветнага першынства.
Футбол у краіне быў менш папулярны за бейсбол — можа таму, што футбалісты ніколі не дасягалі вялікіх поспехаў. Венесуэльцы раўніва сачылі за ўдачамі суседзяў з Бразіліі і Калумбіі.
Перад пачаткам цырымоніі на трыбунах выбухнулі і былі масава падтрыманыя скандаванні супраць прэзідэнта Мадура і ягонага «баліварыянскага рэжыму».
Пратэсты ў Венесуэле працягваюцца ўжо два месяцы. Яны маюць гвалтоўны характар, у іх загінулі 68 чалавек з абодвух бакоў, яшчэ тысячы былі параненыя. Прычынай стала працяглае пагаршэнне эканамічнага становішча, высокая інфляцыя і дэвальвацыя нацыянальнай валюты.
