З усіх фігурантаў «справы патрыётаў» знятае абвінавачанне ў «падрыхтоўцы масавых беспарадкаў». Пра гэта гаворыцца ў заяве Следчага камітэта.
Такім чынам, Камітэт дзяржаўнай бяспекі прызнаў, што складу злачынства па гэтым артыкуле не было.
Разам з тым застаецца актуальнай справа аб стварэнні «незаконнага ўзброенага фармавання». Аднак яе будзе расследаваць не КДБ, а Следчы камітэт.
Па справе аб масавых беспарадках фігурантамі праходзілі 35 чалавек, з іх 20 абвінавачваліся яшчэ і па артыкуле аб незаконным узброеным фарміраванні (дадзеныя КДБ на 11 красавіка).
Па апошніх дадзеных ад праваабаронцаў, у СІЗА КДБ і МУС застаюцца 14 чалавек. Некаторым з іх следства працягнулі на 2-4 месяцы. Астатніх адпускаюць на волю пад падпіску аб нявыездзе і неразгалошванні, з некаторых і зусім здымаюць абвінавачванне.
У аўторак старшыня КДБ Валерый Вакульчык заявіў, што следства разбіраецца і «пакуль заўчасна казаць, ці дойдзе да суда» справа «Белага легіёна».
