Раніцай 1 красавіка 51-гадовы жыхар вёскі Палонка прыехаў у Баранавічы на аўтарынак «Зорны», каб купіць камплектуючыя для аўтамабіля.
На рынку ён так нічога і не купіў. Каля двух гадзін дня ён зайшоў у адну з баранавіцкіх крамаў і купіў бутэльку віна. Схаваўшы яе ў куртку, ён адправіўся ў парк. Там мужчына сеў на лаўку недалёка ад ваенкамата і стаў выпіваць.
Насупраць яго на лаўцы сядзелі тры жанчыны — 26, 27 і 30 гадоў. Мужчына, пабачыўшы іх, расшпіліў шырынку і пачаў мастурбаваць. Пры гэтым ён пільна глядзеў на дзяўчат, спрабуючы сустрэцца з імі позіркам.
«Калі мужчына ўбачыў, што дзяўчаты сталі нешта бурна абмяркоўваць, а потым адна з іх пачала кудысьці тэлефанаваць, ён зашпіліў шырынку і перасеў на лаўку далей ад іх. Неўзабаве яго затрымала міліцыя», — распавёў Intex-press Павел Крупеніч, памочнік Баранавіцкага міжраённага пракурора.
У судзе мужчына растлумачыў, што быў моцна п'яны і яму сорамна за зробленае. Сваю віну ён цалкам прызнаў.
Суд Баранавіцкага раёна і горада Баранавічы прызнаў яго вінаватым у хуліганстве (ч. 1 арт. 339 КК РБ) і прысудзіў да двух месяцаў арышту.
