«Белтэлекам» закупляе адразу 97 аўтамабіляў для сваіх патрэб. Як вынікае з інфармацыі на сайце закупак icetrade, сярод іх 75 легкавікоў і 19 джыпаў.
Як расказаў «Нашай Ніве» інжынер аддзела лагістыкі «Белтэлекама» Аляксандр Мамчыц, гаворка ідзе пра абнаўленне ўсяго аўтапарку.
«Сканчваецца тэрмін эксплуатацыі ўсіх нашых машын. «УАЗікі» і «Газелі» працавалі ў нас больш за 10 гадоў, хоць тэрмін амартызацыі — недзе 7-8 гадоў.
Тыя 97 машын — гэта на ўсю краіну. Джыпы трэба, каб маглі праехаць і зімою, і залеваю, і па брудзе. Нам жа трэба сувязь трымаць любым надвор'ем. У маім разуменні джып — гэта машына павышанай прахадзімасці, з поўным прывадам. Мы ж не «Вольва» сабраліся купляць — нашыя машыны ўсе навідавоку, па горадзе ездзяць. Усе бачаць, што яны для працы», — тлумачыць Аляксандр Мамчыц.
