1 верасня ў Мінску, каля будынка па вуліцы Кірава, 21, навучэнцы былога Нацыянальнага дзяржаўнага гуманітарнага ліцэя імя Якуба Коласа разам з бацькамі і настаўнікамі правялі лінейку, прысвечаную Дню ведаў.
На працягу 11 гадоў навучальная ўстанова размяшчалася ў гэтым будынку, які ў 2003 годзе ўлады перадалі суду Цэнтральнага раёна сталіцы.
Адкрываючы лінейку, дырэктар ліцэя Уладзімір Колас павіншаваў прысутных з Днём ведаў і выказаў падзяку ўсім сябрам ліцэя ў Беларусі і за яе межамі. Паводле яго слоў, гэты навучальны год з’яўляецца годам святкавання 20‑годдзя ліцэя, адкрытага ў 1989 годзе пры Беларускім гуманітарным адукацыйна‑культурным цэнтры. «Ужо ў верасні мы пачнем падрыхтоўку да гэтага свята. Як звычайна, нас чакаюць цікавыя падарожжы ў свет ведаў, сустрэчы з выдатнымі людзьмі і знаёмства з еўрапейскай гісторыка‑культурнай і прыроднай спадчынай», — сказаў У.Колас.
Намеснік дырэктара ліцэя Лявон Баршчэўскі зазначыў, што ліцэісты павінны памятаць пра свой дом па вуліцы Кірава, 21.
«Бо ў гэтым гістарычным будынку з канца XIX стагоддзя заўсёды размяшчаліся навучальныя ўстановы. І мы ўпэўнены, што з часам ліцэй вернецца ў свой дом», — сказаў Л.Баршчэўскі.Ён заклікаў выкладчыкаў і ліцэістаў высока несці марку навучальнай установы, якая вылучаецца прыхільнасцю да нацыянальный традыцый і высокім узроўнем ведаў.
Прысутныя выканалі гімн «Гаўдэамус ігітур» і ўсклалі кветкі да сцен будынка.
Нагадаем, за 19 гадоў існавання гэта ўстанова прайшла шлях ад нядзельнай навучальнай установы пазакласнага тыпу да Нацыянальнага дзяржаўнага гуманітарнага ліцэя імя Якуба Коласа Міністэрства адукацыі з філіяламі ва ўсіх абласцях краіны. Вясной 2003 года ліцэй быў закрыты ўладамі. Нягледзячы на гэта, навучальная ўстанова працягвае працаваць у неафіцыйным статусе Беларускага гуманітарнага ліцэя. Навучэнцы самастойна вывучаюць курс сярэдняй школы і здаюць экзамены экстэрнам.
