За апошнія 20 гадоў у выніку стыхійных бедстваў загінулі 1,35 млн чалавек, за гэты перыяд паводкі, землятрусы і іншыя прыродныя стыхіі нанеслі шкоду ў памеры $2,5 трлн, паведамляе Цэнтр навін ААН.
У апошнія гады ў свеце пачасціліся прыродныя бедствы і анамальныя з'явы надвор'я, якія прыводзяць да гібелі людзей і велізарных эканамічных страт. Такім чынам, дзяржавы павінны больш інвеставаць у праекты па зніжэнні небяспекі бедстваў (напрыклад, планаваць будаўніцтва больш трывалых жылых дамоў, асабліва ў сейсманебяспечных зонах).
Многія буйныя гарады размешчаныя ў сейсманебяспечных зонах геалагічных разломаў. Іх жыхары падвяргаюцца небяспецы магутных землятрусаў. У цяперашні час такіх гараджан 370 млн, а да 2050 года іх стане ўжо 870 млн. Да 2050 года колькасць гарадскога насельніцтва ў зонах, дзе часта бушуюць ураганы, таксама ўзрасце — з 310 млн да 680 млн чалавек.
Міжнародны дзень па змяншэнні небяспекі бедстваў адзначаецца 13 кастрычніка.
