Святаслаў Барановіч прысуджаны да 3 гадоў калоніі. Падчас леташняга «Марша недармаедаў» ён ударыў амапаўца ў цывільным, калі той кінуўся на пратэстоўцаў.
Яшчэ да пачатку пасяджэння было вядома, што Барановіч, найхутчэй, не будзе прызнаны палітвязнем. Пасля агалошвання выраку пазіцыя праваабаронцаў не змянілася.
«З улікам асаблівасцяў і абставінаў справы, і паказанняў самога абвінавачанага палітвязнем мы яго не прызнаем, - распавёў «Нашай Ніве» праваабаронца-вясновец Валянцін Стэфановіч. — Гэта было гвалтоўнае правапарушэнне — паводле нашых крытэраў, у такім выпадку мы не прызнаем чалавека палітвязнем. Таксама ўлічваем яго пазіцыю і паказанні ў судзе: Барановіч прызнаў віну ў поўным аб’ёме і казаў, што ведаў, што біў міліцыянта».
Не прызнаюць Барановіча палітычным вязнем і іншыя беларускія праваабаронцы. Пра гэта распавёў Еўрарадыё кіраўнік Беларускага Хельсінскага камітэта Алег Гулак.
