«Прыглядаю сабе ўчастак пад будаўніцтва дома, унутры другой кальцавой. Рэгулярна вывучаю аб'явы. І знайшоў ідэальную — 15 сотак за 8 кіламетраў ад Мінска, усяго за 12 тысяч даляраў. Але надзел аказаўся не без сюрпрызу. Увогуле, здаецца, новы від разводаў з'явіўся», — распавёў чытач партала TUT.BY Аляксей.
Аляксей кажа, што стэлефанаваўся з чалавекам, які назваўся Вадзімам, уладальнікам участка. Той з ходу прапанаваў ехаць глядзець і ўжо там абмяркоўваць нюансы.
— Ужывую надзел выглядаў шыкоўна — на краі маляўнічай вёсачкі, абнесены агароджай, роўны, квадратны. Я пытаюся ў Вадзіма: а абцяжаранні якія па ўчастку? Можа, выдаваўся як тым, хто жыве ў нястачы? Не, кажа, вось бабулін дом, у спадчыну застаўся, і два ўчасткі да яго ў прыватнай уласнасці. Пытаюся ўжо ў лоб: дык у чым падвох? Ён кажа: ну, ёсць невялікая тонкасць, гэтыя соткі пазначаныя як для вядзення асабістай падсобнай гаспадаркі. Але гэта ж не бяда, маўляў, ты ж чытаў — вакол вёсак будуць наразаць участкі на аўкцыёны — пад шумок і зменіш мэтавае прызначэнне ўчастка.
Аляксей кажа, што Вадзім быў абаяльны.
— Расказваў пра сувязі ў райвыканкаме і сельсавеце і што «пытанне змены мэтавага прызначэння ўчастка вырашальнае, усюды ж свае людзі». Абяцаў зніжку, падтрымку пры пераафармленні ўчастка. Увогуле, балбатаў як тыповы махляр. Я адмовіўся, а потым усе яго аб'явы выпарыліся. Ці то знайшоў наіўнага, ці то знайшлі ўправу на яго самога.
Што такое ўчастак пад АПГ?
— Зямельныя ўчасткі пад вядзенне асабістай падсобнай гаспадаркі прызначаныя для вырошчвання пладова-ягадных насаджэнняў, вырошчвання сельскагаспадарчых культур, а таксама размяшчэння пабудоў для складавання інвентара і захоўвання ўраджаю, — патлумачыла эксперт групы кампаній «Твая сталіца». — Узвядзенне пабудоў жылога прызначэння на такіх участках не дазваляецца.
У заканадаўстве сказана, што «грамадзяне, якія ажыццяўляюць вядзенне асабiстай падсобнай гаспадаркi, маюць права ўзводзіць у вызначаным заканадаўствам Рэспублікі Беларусь парадку гаспадарчыя будынкі і збудаванні, неабходныя для вядзення асабістай падсобнай гаспадаркі, на зямельных участках, прадастаўленых для гэтых мэтаў у адпаведнасці з заканадаўствам Рэспублікі Беларусь аб ахове і выкарыстанні земляў».
Прадаваць і купляць ўчасткі пад АПГ законам не забаронена.
Пабудаваць можна хлеў. І жыць у хляве
У рыэлтарскіх базах мы знайшлі яшчэ некалькі аб'яў аб продажы участкаў пад АПГ. Але рыэлтары адразу і сумленна папярэджваюць: калі вы пабудуеце на такім участку хату, вы яе не зможаце зарэгістраваць. Усё, што будзе тут пабудавана, аўтаматычна — гаспабудова. Акрамя таго, каб купіць гэты ўчастак, трэба зарэгістравацца ў гэтай вёсцы (ці ў суседняй, галоўнае, каб яна адносілася да гэтага ж сельсавета).
У тэорыі, калі пабудуеце домік і паселіцеся там, зносіць вас не прыедуць. Чалавек жа мае права пастаянна жыць хоць у будцы, хоць у хляве, хоць на вуліцы на кардонцы.
Рыэлтары ўспамінаюць: яшчэ да 2014-га заканадаўства дазваляла ў асаблівых выпадках мяняць мэтавае прызначэнне такіх надзелаў. І ў тэорыі заканадаўства можа яшчэ раз змяніцца. Але на тэорыю лепш не разлічваць.
Увогуле, чытач Аляксей мае рацыю збольшага: продаж участка пад АПГ, запакаваны ў абяцанні, што можна будзе пабудаваны там дом зарэгістраваць, — гэта падман. А вось сам продаж — цалкам законны.
