Футбалісты барысаўскага БАТЭ выйгралі ў гасцях у грэчаскага ПАОКа з лікам 3:1 у матчы заключнага 6-га тура групавога этапу Лігі Еўропы. Тым самым барысаўчане забяспечылі сабе выхад у плэй-оф турніру.
Фота: ФК ПАОК.
Сустрэча ў Салоніках пачалася з атак гаспадароў, якія на працягу ўсяго матчу больш валодалі мячом, але пераважна іх атакі мала пагражалі браме Дзяніса Шчарбіцкага.
На 18-й хвіліне гульні адзін з контрвыпадаў барысаўчан завяршыўся голам — пасля перадачы з левага фланга лік адкрыў Максім Скавыш.
За 3 хвіліны да перапынку грэкі парушылі правілы ў сваёй штрафной плошчы, і Мікалай Сігневіч рэалізаваў пенальці. Ён жа аформіў дубль на першай кампенсаванай хвіліне — 3:0.
Другі тайм пачаўся не так шчасліва для БАТЭ. На 59-й хвіліне Прыёвіч адыграў адзін мяч, забіўшы пасля прастрэла Жабы. А праз 2 хвіліны Сігневіч, які адзначыўся дублем, штурхнуў суперніка і атрымаў чырвоную картку.
Аднак барысаўчане здолелі выстаяць у меншасці. Выніковы лік — 3:1, і БАТЭ разам з Чэлсі адпраўляюцца з групы L у плэй-оф. А Відзі і ПАОК вылятаюць з турніру.
