З 2 студзеня супрацоўнікам аператыўных брыгад хуткай дапамогі забараняецца адмаўляцца ад прапанаваных ім бахілаў. Пра гэта гаворыцца ў дакуменце за подпісам галоўнага доктара мінскай Гарадской станцыі хуткай медыцынскай дапамогі Аляксандра Жынко, дасланым у Рэдакцыю «Нашай Нівы».
Загад звязаны з сітуацыяй, якую апісвае Жынко:
«У гарадскую станцыю хуткай дапамогі 19.12.2018 паступіў зварот ад грамадзянкі Н., якая інфармавала аб тым, што супрацоўнікі брыгады хуткай медыцынскай дапамогі на прапанову надзець бахілы адказалі сустрэчнай прапановай — прыбраць дываны. Выкладзеная інфармацыя пацвердзілася цягам службовай праверкі», — гаворыцца ў дакуменце.
Каб прадухіліць канфліктныя сітуацыі, Жынко загадвае супрацоўнікам выяздных прыгад выкарыстоўваць бахілы, прапанаваныя пацыентамі, а таксама забараняе адмаўляцца ад такіх прапаноў.
Меркаванні мінскіх медыкаў у сацыяльных сетак падзяліліся: нехта мяркуе, што ў гэтым няма нічога цяжкага.
Іншыя ж кажуць, што ў сітуацыі, калі чалавеку патрэбна неадкладная дапамога, медыкі не мусяць губляць час на бахілы, бо здароўе важнейшае за чысціню дываноў — маўляў, бываюць крытычныя выпадкі, калі лішнія 30 секунд маюць вялізнае значэнне.
«Але часта нас выклікаюць, бо лянота ісці ў паліклініку і стаяць у чарзе, тады ў чалавека сапраўды застаюцца сілы дбаць аб чысціні ў кватэры, у якую не мы самі прыйшлі, а ён нас паклікаў», — пішуць дактары.
