Да «Нашай Нівы» звяртаўся супрацоўнік расійскага піяр-агенцтва, які хацеў замовіць ачарняльны артыкул пра завод «Штадлер».
Яе даслаў чалавек, які прадставіўся Максімам Цітовым, з адпаведным электронным адрасам. У лісце, які да нас прыйшоў, была інфармацыя, якая адсутнічае ў публічным доступе.
Чытайце таксама: Расійскае PR-агенцтва прапанавала «Нашай Ніве» апублікаваць замоўны артыкул, які ачарняе «Штадлер»
Аднак агенцтва «Міхайлаў і партнёры», ад імя якога выступаў Цітоў, абвяргае сваю датычнасць.
Адпаведны ліст яны даслалі на пошту «Нашай Нівы».
«Паведамляем, што нашае агенцтва не мае дачынення да спрэчкі, якую вы апісваеце, і не працуе ні з адным з бакоў, уцягнутым у гэта. Таксама чалавек па імені Максім Цітоў не працуе і ніколі не працаваў у агенцтве «Міхайлаў і партнёры», а метады працы, апісаныя ў публікацыі, непрымальныя для нашай кампаніі. Мы занепакоены тым фактам, што нехта прыкрываецца нашым іменем у рабоце з вамі», — значыцца ў адказе кампаніі.
Праўда, патрэбна літаральна пару хвілін вэб-пошуку, каб выявіць, што Максім Цітоў усё ж раней працаваў у агенцтве «Міхайлаў і партнёры». Урэшце дырэктар агенцтва прызнаў гэты факт, але запэўніў, што гэта было даўно. Таму, маўляў, Цітоў можа працаваць у іншым агенцтве.
