facebook.com/globel24/
Паштовы аператар «ГлоБел24» абвясціў пра закрыццё бізнесу. Пра гэта TUT.BY паведамілі супрацоўнікі і кліенты кампаніі.
— У мінулую пятніцу кіраўнік напісаў у чат, што «наша кампанія ў сувязі з фінансавымі цяжкасцямі вырашыла пачаць працэс ліквідацыі». Ён таксама паведаміў, што «працуем апошні тыдзень, а потым кампанія спыняе сваю дзейнасць». Персаналу ён прапанаваў: або «пішыце заявы па ўласным жаданні, або вашы працоўныя будуць у нас, пакуль працэс ліквідацыі не будзе завершаны, а ўвесь гэты час вы будзіце знаходзіцца ў неаплатным адпачынку», — сказала супрацоўніца «ГлоБел24».
Паводле яе слоў, «нічога не прадракала бяды, кампанія дынамічна развівалася».
Кліенты «ГлоБел24» атрымалі паведамленні аб скасаванні дагавораў на аказанне паслуг (паштовай сувязі, кур'ерскіх паслуг, паслуг транспартнай экспедыцыі, перавозкі) у аднабаковым парадку. На працягу 9-12 сакавіка кампанія плануе выканаць узятыя абавязацельствы, а затым спыніць сваю дзейнасць.
— Гэта была адна з самых цікавых, гнуткіх, зручных і дынамічных службаў дастаўкі. Таму іх паведамленне было нечаканым, як гром сярод яснага неба, — кажуць у адной з інтэрнэт-крам, у якога была заключана дамова з «ГлоБел24».
Удзельнікі рынка лічаць, што канкурэнтны рынак дастаўкі ў Беларусі толькі пачаў фармавацца, таму «вельмі шкада, што на аднаго цікавага гульца стане менш». Яны спадзяюцца, што «такія кампаніі, як «Белпошта», DPD або той жа «Еўраопт» змогуць прапанаваць якасныя паслугі па разумных цэнах».
«ГлоБел24» пачаў сваю дзейнасць у 2014 годзе. Паштовы аператар меў шырокую сетку з 52 аддзяленняў у 45 гарадах Беларусі, гаворыцца на сайце кампаніі. У кампаніі працуе каля 100 чалавек.
