Саудаўская нафтавая карпарацыя Saudi Aramco зноў адклала ў нядзелю фарміраванне цэнавага графіка на майскія экспартныя пастаўкі, паведамляюць інфармагенцтвы са спасылкай на Bloomberg.
Новая адтэрміноўка звязана з перамовамі аб скарачэнні здабычы нафты паміж Саудаўскай Аравіяй і Мексікай, якія ўсё яшчэ працягваюцца.
5 красавіка Bloomberg, спасылаючыся на крыніцы, паведаміла, што фарміраванне графіка экспартных цэн адкладзена да 7 ці 9 красавіка. Затым кампанія перанесла яго на 11 красавіка, разлічваючы апублікаваць графік пасля перамоў міністраў краін АПЕК+ 9 красавіка, а таксама нарады міністраў энергетыкі краін G20 10 красавіка.
Краіны АПЕК+ у ноч на пятніцу дамовіліся скараціць здабычу нафты на 10 млн барэляў у суткі (б/с) у маі — чэрвені. Пры гэтым абмежаванне здабычы працягнецца аж да мая 2022 года, але ўжо ў меншым аб'ёме. Згодна з планам АПЕК+, кожная з 23 краін-удзельніц павінна знізіць здабычу на 23% ад узроўню кастрычніка 2018 года.
Выключэнне складаюць Расія і Саудаўская Аравія, якія на роўных будуць зніжаць здабычу ад 11 млн б/с да 8,5 млн б/с.
Канчатковаму заключэнню здзелкі перашкодзіла Мексіка, якая адмовілася скарачаць здабычу на прапанаваныя ёй 400 тыс. б/с, а пагадзілася толькі на 100 тыс. б/с. Затым, па словах прэзідэнта Андрэса Мануэля Лопеса Абрадора, Мехіка дамовіўся з АПЕК+ і Вашынгтонам аб тым, што рэальнае скарачэнне мексіканскай здабычы складзе 100 тыс. б/с, а яшчэ 250 тыс. б/с за Мексіку скароцяць ЗША.
