У Гомелі памерла загадчыца дзіцячага садка №130 Таццяна Невіркавец. Жанчыне было 36 гадоў. Да гэтага яна тыдзень была на ШВЛ. Пра трагедыю TUT.BY паведамілі бацькі выхаванцаў, у садзе гэта пацвердзілі.
Таццяна Невіркавец. Фота: Афіцыйны сайт дзіцячага садка №130 г. Гомеля
У садзе кажуць, што загадчыца сышла на бальнічны ў сярэдзіне красавіка. 20-га яе паклалі ў бальніцу з пнеўманіяй. Тыдзень таму стала вядома, што яна на ШВЛ, а ўчора калектыву паведамілі, што загадчыца памерла.
Загадчыца дзіцячага сада жыла з бацькамі. Цяпер, кажуць работнікі саду, яны таксама ў бальніцы.
Другая ахвяра каранавіруса, пра якую стала вядома сёння, — фельчар хуткай дапамогі Аляксей. У канцы красавіка ён адчуў сябе дрэнна, звярнуўся ў паліклініку, і яму адразу дыягнаставалі двухбаковую пнеўманію, яшчэ праз некалькі дзён — каранавірус. 5 мая мужчына памёр у бальніцы, паведамляе TUT.BY.
38-гадовы Аляксей ужо шмат гадоў працаваў на 6-й падстанцыі хуткай медыцынскай дапамогі ў Мінску. Як распавядае ягоная жонка Алеся, 21 красавіка мужчына пасля адпачынку выйшаў на працу, праз тыдзень адчуў сябе дрэнна.
У той жа дзень Аляксея шпіталізавалі ў 1-ю мінскую бальніцу, зрабілі КТ і ўзялі мазкі на каранавірус.
— Мы размаўлялі па тэлефоне, муж распавядаў, у палату заходзяць толькі медсёстры, прыносяць таблеткі, лекараў не было. Ён не разумеў, з кім размаўляць. Я звязалася з загадчыцай падстанцыі, дзе працуе Аляксей: «Трэба ж нешта рабіць, яму ўсё горш і горш». Яна патэлефанавала ў бальніцу, там адказалі, што ўсё робяць. А муж казаў: яму не ставілі кропельніцы, не рабілі ўколы. Я сама павезла ў бальніцу імпартныя антыбіётыкі, — успамінае жонка Алеся.
Па яе словах, 2 мая стаў вядомы вынік на каранавірус, ён быў станоўчым. У той жа дзень мужчына адчуў сябе горш, а праз тры дні сканаў у рэанімацыі.
У Аляксея засталося двое дзяцей.
Магчыма, самая маладая ахвяра каранавіруса ў Беларусі — студэнтка Гомельскага медыцынскага каледжа. Пра яе смерць паведамляе «Камсамольская праўда ў Беларусі». Дзяўчыне быў усяго 21 год. Бахар прыехала з Туркменістана і вучылася ў Беларусі як замежная студэнтка.
Афіцыйна пра трагедыю ніхто не паведаміў. На званок «КП» у каледж у адміністрацыі коратка адказалі дзяжурнае «Без каментароў» і кінулі слухаўку.
— 5 мая ў нашых групах у сацсетках з'явіліся паведамленні пра гэта, а 6 мая да нас прыйшла загадчыца аддзялення і распавяла пра ўсё, — кажуць студэнты самога каледжа.
Бахар жыла ў інтэрнаце і ў каледж не хадзіла ўжо з канца сакавіка, бо дрэнна сябе адчувала праз цукровы дыябет, ездзіла па бальніцах для абследавання, можа, там і падхапіла вірус, лічаць самі студэнты.
— Потым выявіўся гэты каранавірус — нам гэта дакладна сказалі. З-за пагаршэння стану яе паклалі ў рэанімацыю. Там яна і памерла, — кажуць студэнты.
Дзяўчаты, якія жылі ў пакоі з Бахар, знаходзяцца на самаізаляцыі. У іх узялі мазкі, але пакуль вынікаў няма.
Каледж на каранцін не закрывалі, заняткі праходзяць як і раней. Інтэрнат таксама не зачынялі — напэўна, чакаюць распараджэння зверху. Улічваючы, што Бахар даўно не з'яўлялася тут, наўрад ці закрыюць.
Студэнтаў прасілі здаць грошы на дапамогу сям'і памерлай дзяўчыны.
