У Магілёве праходзіць суд над Сяргеем Ціханоўскім. Справу разглядае суддзя Алена Літвіна Ленінскага раёна ў будынку абласнога суда, піша Tut.by
У пратаколе пазначана, што Сяргей парушыў закон Аб масавых мерапрыемствах: удзельнічаў у недазволеным гарвыканкамам пікеце 27 мая ў Магілёве падчас збору подпісаў за кандыдата ў прэзідэнты Святлану Ціханоўскую.
Суд ідзе па відэасувязі — Сяргей Ціханоўскі знаходзіцца ў СІЗА № 1 Мінска. У кадры відаць, што ён знаходзіцца ў клетцы ў маленькім пакоі. Ён моцна схуднеў, але голас бадзёры. Працэс пачаўся са спазненнем.
Слуханне адкрытае, але праходзіць у невялікай зале, а прысутнічаць на ім захацелі каля 30 чалавек, якія вырашылі падтрымаць Ціханоўскага. Яны ўгаворвалі супрацоўніка міліцыі, суддзю правесці пасяджэнне ў большай зале, каб Ціханоўскі «бачыў, што ён не адзін». Міліцыянт на гэта адказаў, што «няма тэхнічнай магчымасці».
У выніку ў зале суда, акрамя суддзі, сакратара і адваката, прысутнічаюць журналісты, некалькі слухачоў, супрацоўнікі міліцыі.
У пратаколе пазначана, што 27 мая, прыкладна з 17 да 19, пры правядзенні пікета па зборы подпісаў за Святлану Ціханоўскую каля ГЦ «Атрыум» Сяргей прыняў актыўны ўдзел у несанкцыянаваным гарвыканкамам пікетаванні, выкарыстаў ўзмацняльнік. Гэтым і парушыў закон аб масавым мерапрыемстве.
На пытанне суддзі Ціханоўскі адказаў, што віну не прызнае.
Ён хадайнічаў аб пераносе суду, таму што ён «нават не ведаў, што будзе суд». Па словах Сяргея, яго не апавясцілі належным чынам пра слуханні. Ён таксама заявіў пра маральны ціск на яго ў СІЗА. Сказаў, што ў яго правялі поўны ператрус, прымусілі распрануцца пры шасці супрацоўніках і пры гэтым сказалі, што ў яго зараз будзе слуханне.
Суддзя Літвіна хадайніцтва адхіліла. Яна заявіла, што суд належным чынам апавясціў яшчэ 21 ліпеня ўсіх удзельнікаў працэсу: сведак, адваката, самога Ціханоўскага. І прапанавала Сяргею пагутарыць з адвакатам — дала на гэта 15 хвілін.
Ціханоўскі заявіў, што жадае азнаёміцца з матэрыяламі справы, паглядзець відэазапіс, які да яе далучаны. На гэта суддзя сказала, што матэрыялы справы будуць абвешчаныя падчас слухання.
Пасля перапынку ў судзе дапыталі сведкаў — інспектара ДПС ДАІ Арцёма Родзькіна і інспектара прафілактыкі Ленінскага РАУС Магілёва Аляксандра Тамашова. Ціханоўскі запярэчыў суду, што ён павінен азнаёміцца з матэрыяламі справы, каб задаваць пытанні сведкам, але суд гэта праігнараваў.
Інспектар ДАІ Родзькін распавёў у судзе, што патруляваў горад па маршруце, у тым ліку праязджаў міма ГЦ «Атрыум», што бачыў там вялікую колькасць людзей, бачыў мужчыну з мегафонам, чуў, што ён казаў «Стоп, таракан» — форткі ў службовай машыне былі адкрыты, таму што праводзіў прафілактычныя гутаркі з парушальнікамі ПДР. Так было і з кіроўцам, які парушыў правілы дарожнага руху і прыпаркаваўся на прыпынку. Родзькін сказаў, што ён размаўляў з кіроўцам, калі да яго падышоў мужчына з мегафонам — Ціханоўскі. Ён далучыўся да размовы, патрабаваў у інспектара службовае пасведчанне. Ніякага фізічнага ўздзеяння на яго не аказвалі, як сказаў Родзькін, «хутчэй, псіхалагічнае».
Адказваючы на пытанні абаронцы і Ціханоўскага, інспектар сказаў, што не памятае, каб чуў нецэнзурную лаянку ад кагосьці.
Інспектар прафілактыкі Ленінскага РАУС Аляксандр Тамашоў сказаў, што ішоў па службе ў аддзяленне пошты праз плошчу перад «Атрыумам». Убачыў там шмат людзей, бачыў і сталы, за якімі збіралі подпісы. І ўбачыў мужчыну ў масцы з надпісам «Краіна для жыцця» — Ціханоўскага, — які размаўляў з людзьмі, у тым ліку казаў нешта ў мікрафон на відэакамеру.
Інспектар кажа, што чуў, як Ціханоўскі казаў у гучнагаварыцель «Стоп, таракан!», «Жыве Беларусь», «перадаваў тапак, з якім людзі фатаграфаваліся».
Сяргей Ціханоўскі спытаў інспектара, хіба не павінен ён пры правапарушэнні адрэагаваць — зрабіць заўвагу. І калі правапарушэнне было, то чаму інспектар не зрабіў заўвагу, інакш ён, выходзіць, не выканаў службовыя абавязкі. Або правапарушэння не было? Інспектар адказаў, што проста стаў выпадковым сведкам, у яго былі іншыя службовыя задачы і ён бачыў там супрацоўнікаў ДАІ.
Фота: Анжаліка Васілеўская, TUT.BY
У судзе абвясцілі матэрыялы справы. З іх вядома, што ДАІ накіравала ў Ленінскі РАУС ліст аб несанкцыянаваным мерапрыемстве, што ў аснову абвінавачвання лягло двухгадзіннае відэа з ютуб-канала «Краіна для жыцця». Яго глядзяць у судзе амаль у поўным аб'ёме — пра гэта папрасіў Ціханоўскі.
Падчас прагляду адна з жанчын, якая прысутнічала на працэсе, выкрыкнула «Сяргей, мы з табой!», перапрасіла і выйшла з залі. Да гэтага суддзя строга сачыла за тым, каб выконвалася цішыня і ніхто не здымаў фота і відэа. Нават запатрабавала прыбраць мабільныя тэлефоны.
Следам за жанчынай яшчэ некалькі чалавек выгукнулі «Сяргей, мы з табой!», «Стоп, таракан!» і выйшлі. Суддзя папрасіла ўсіх слухачоў выдаліцца з залы за парушэнне.
Па рашэнні суда, Сяргей Ціханоўскі атрымаў 15 сутак арышту.
