Дзмітрый Мазура, студэнт 4-га курса БДУІР, выйшаў на волю з турмы ў Жодзіне. Пра гэта рэдакцыі 2 лістапада ў 19.18 паведаміў яго сябар, які прыехаў сустракаць Мазуру. Нагадаем, студэнта арыштавалі сумарна на 38 сутак, піша Tut.by.
Фота: Tut.by.
Першы працэс над Дзмітрыем прайшоў 28 верасня. Суд Савецкага раёну сталіцы пакараў хлопца 23 суткамі: 13 далі па арт. 23.34 і 10 — па арт. 23.4 КаАП. Затрымалі студэнта каля ўніверсітэта, калі ён ішоў да метро, каб з'ехаць дадому. Тады Мазуру абвінавацілі ва ўдзеле ў акцыі каля ўніверсітэта, якая прайшла 22 верасня.
Другі суд над Дзмітрыем адбыўся 5 кастрычніка, пакуль ён адбываў свой папярэдні арышт. Тады яго судзілі за ўдзел у шэсці студэнтаў 1 верасня. І зноў суд Савецкага раёна прызнаў студэнта вінаватым, прызначыўшы максімальнае пакаранне — 15 сутак адміністрацыйнага арышту.
Сумарны тэрмін арышту склаў 38 сутак.
