president.gov.by
Падчас нарады па эпідэміялагічнай абстаноўцы Лукашэнка даручыў арганізаваць рэгіянальныя штабы па рэагаванні на сітуацыю з COVID-19, паведамляе прэс-служба.
— У перыяд вясновай хвалі каранавіруса мы зрабілі стаўку на мясцовыя ўлады як на апорныя цэнтры прыняцця аператыўных рашэнняў. І гэтая практыка даказала сваю эфектыўнасць. Сёння складваецца падобная сітуацыя. Таму нам варта на працягу аднаго-двух дзён арганізаваць рэгіянальныя штабы, — сказаў ён.
Паводле яго слоў, персанальную адказнасць за працу гэтых рэгіянальных штабоў і вынікі павінны несці губернатары і памочнікі прэзідэнта. Дапамагаць ім будуць лепшыя дактары-інфекцыяністы, прадстаўнікі медыцынскай навукі, іншыя спецыялісты.
Ён пералічыў, хто будзе адказваць за кожны з рэгіёнаў.
За Брэсцкую і Гродзенскую вобласці адказвае старшыня Гродзенскага аблвыканкама і былы міністр аховы здароўя Уладзімір Каранік. У дапамогу Уладзіміру Караніку вызначаны — галоўны доктар Брэсцкай абласной клінічнай бальніцы Аляксандр Карпіцкі і рэктар Гродзенскага дзяржаўнага медыцынскага ўніверсітэта Алена Краткова.
Адказваць за працу ў Віцебскай вобласці будуць рэктар Віцебскага дзяржаўнага медыцынскага ўніверсітэта Анатоль Шчасны, загадчык кафедры інфекцыйных хвароб гэтага ўніверсітэта Валерый Сямёнаў і галоўны доктар Віцебскай абласной клінічнай інфекцыйнай бальніцы Таццяна Кавалёва.
У Гомельскай вобласці — рэктар Гомельскага дзяржаўнага медыцынскага ўніверсітэта Ігар Стома.
У Магілёўскай вобласці адказнымі за працу з COVID-19 вызначаны член Савета Рэспублікі Нацыянальнага сходу, доктар медыцынскіх навук, прафесар, заслужаны лекар Беларусі Алег Суконка і намеснік галоўнага доктара Магілёўскай інфекцыйнай бальніцы №1 Ірына Бас.
У Мінскай вобласці — памочнік прэзідэнта і доктар з адукацыі Аляксандр Косінец, галоўны дзяржаўны санітарны доктар-намеснік міністра аховы здароўя Аляксандр Тарасенка і прафесар кафедры інфекцыйных хвароб БДМУ Дзмітрый Данілаў. Ім у дапамогу — галоўны лекар Рэспубліканскага клінічнага медыцынскага цэнтра Упраўлення справамі прэзідэнта Ірына Абельская.
За Мінск адказваюць старшыня Савета Рэспублікі Нацыянальнага сходу Наталля Качанава і в. а. міністра аховы здароўя Дзмітрый Піневіч.
Групу экспертаў, якія будуць кансультаваць усе рэгіёны, сфармуе і ўзначаліць загадчык кафедры інфекцыйных хвароб Беларускага дзяржаўнага медыцынскага ўніверсітэта Ігар Карпаў, які мае ганаровае званне «Народны доктар Беларусі».
