6 лістапада ў сеціва выклалі «патрыятычны» відэаролік, у якім прызыўнікі Рагачоўшчыны чытаюць на камеру вершы. Сутнасць, калі коратка, — не аддамо «любімую» лялькаводам.
Карацей, глядзіце самі:
«Наша Ніва» пагаварыла з адным з удзельнікаў відэа.
Хлопца завуць Міхаіл Гацакоў (у відэа яго прозвішча напісана чамусьці з памылкай).
Ён распавёў, што запіс адбываўся, калі прызыўнікоў інструктавалі перад адпраўкай у войска. Выглядае, што адмыслова адабралі тых, хто будзе служыць ва ўнутраных войсках МУС і сілах спецаперацый.
«Мы сядзелі ў агульным пакоі, нам расказвалі, як будзе праходзіць адпраўка ў войска, як трэба сябе паводзіць. Пасля прыйшоў ваенкам, назваў імёны-прозвішчы, папрасіў паўдзельнічаць. Далі тэксты, сказалі — чытайце, — кажа Міхаіл. — Хто аўтар верша, я не ведаю. Кожнаму далі па чатыры радкі, вывучылі хутка.
Навошта гэта было зроблена, нам дакладна не паведамілі. Сказалі: не падстаўляйце ваенкамат, проста прачытайце. Мне было няцяжка, я і прачытаў. Здымалі на камеру, папярэдзілі, што выкладуць. Але нам усё роўна — сказалі, ну мы і прачыталі».
Рэжысура — таксама ваенкамаўская. Пякельны пачатак прыдумалі там жа.
«Нам проста казалі, як рабіць, мы і рабілі. Мы ж проста ўдзельнікі», — кажа Міхаіл.
«Наша Ніва» пацікавілася ў хлопца, ці хацеў ён трапіць служыць у МУС і з якімі пачуццямі туды ідзе.
«Хацеў, але з гэтай абстаноўкай у краіне… У мяне там сябар нармальна служыў, да гэтага ўсяго. А тут я не ўлічыў, што так усё абернецца, — наракае Міхаіл. — Я не ведаю, што там у часці будзе адбывацца… Але загад і загад. Войска ёсць войска».
А ці хочацца яму самому бегаць і разганяць мітынгі?
«Канечне, не хочацца, навошта яно мне, — кажа хлопец. — Але ж ужо ўсё, напісалі — трэба ісці служыць. «Загады выконваць будзеш?» Буду. «Служыць хочаш?» Хачу. Усё, пайшоў».
Міхаілу — 21. На жнівеньскіх выбарах ён ужо галасаваў. Праўда, за каго — не прызнаецца.
«Мой сакрэт», — кажа юнак.
