Імя геніяльнага майстра музычных інструментаў Андрэя Шклёды з Пінска вядома далёка за межамі Беларусі. У Андрэя не было спецыяльнай адукацыі, ён — самавук. Але вучыцца да яго тонкасцям рэдкага рамяства прыязджалі майстры з Расіі, Украіны, краін Балтыі. На вырабленых ім інструментах сёння граюць беларускія і замежныя знакамітасці. Пра тое, як змянілася жыццё музыкі пасля падзей жніўня, піша «Медыя-Палессе».
10 жніўня Андрэй быў жорстка збіты супрацоўнікамі сілавых структур. Спачатку на вуліцы Кірава ў Пінску, дзе яго разам з братам Раманам схапілі невядомыя і даставілі ў будынак Пінскага ГАУС. Затым гвалт працягваўся ў адным з кабінетаў, потым у памяшканні стралковага ціра. Патрабавалі прызнацца, што ў ноч з 9 на 10 жніўня знаходзіўся ў шэрагах пратэстоўцаў.
Палітыкай не цікавіўся, нават на выбары ніколі не хадзіў. Яго цікавасцю па жыцці была музыка, а галоўным багаццем — рукі і тонкі музычны слых. Якраз па іх і прыйшоўся асноўны ўдар кулакамі, дубінкамі і ботамі. Андрэя збівалі так, што галава была падобная на мяч, а рукі надоўга страцілі адчувальнасць. У перапынку паміж збіццём ён ляжаў у лужыне ўласнай крыві, прыціснуты да падлогі чужым ботам. А яшчэ быў страх за сваіх блізкіх. Сілавікі праглядалі змесціва яго мабільнага тэлефона, фатаграфіі жонкі і сына і пагражалі прыехаць да яго ў Кудрычы і зладзіць расправу над сям'ёй.
У адзін міг былі растаптаныя мары пра шчаслівае сямейнае жыццё ў палескай глыбінцы. Незадоўга да жнівеньскіх падзей Андрэй Шклёда вярнуўся з Польшчы. Купіў домік у вёсцы Кудрычы і перабраўся сюды разам з сям'ёй. Збіраўся аддаць сына ў найбліжэйшую сельскую школу.
Памятаючы пра пагрозы расправы, Андрэй доўгі час баяўся вяртацца дадому, жыў у брата і знаходзіўся ў стане дэпрэсіі.
На дапамогу геніяльнаму майстру прыйшла музычная супольнасць. Даведаўшыся пра тое, што з ім здарылася, музыканты арганізавалі Андрэю і яго брату Раману курс рэабілітацыі ў Чэхіі.
Як распавяла Медыя-Палессю іх сястра Вольга, пасля таго, што з Андрэем здарылася 10 жніўня ў Пінску, ён баіцца вяртацца ў Беларусь, дзе чалавека проста так могуць схапіць на вуліцы, даставіць у аддзяленне міліцыі і там збіваць. І мае намер застацца ў Чэхіі. Беларуская дыяспара там вельмі гасцінна прыняла сваіх землякоў. Дапамагае і маральна, і матэрыяльна. Клапоціцца пра іх і чэшская дзяржава. Сёння браты вывучаюць чэшскую мову, плануюць знайсці сабе працу ў Чэхіі.
У пачатку лістапада да сваіх мужоў адправіліся і жонкі з дзецьмі. Сем'і ўз'ядналіся.
Андрэй Шклёда з жонкай і сынам у Кудрычах.
