Пра гэта Tut.by паведамілі адвакаты экс-прэтэндэнта ў прэзідэнты Дзмітрый Лаеўскі і Наталля Мацкевіч.
Цяпер справа Віктара Бабарыкі знаходзіцца ў Вярхоўным судзе, куды яна была перададзеная з Генеральнай пракуратуры. На гэтай стадыі Вярхоўны суд павінен вызначыць, у якім судзе будзе слухацца справа.
— Разгляд спраў такой катэгорыі згодна з Крымінальна-працэсуальным кодэксам магчымы ў любым з ніжэйшых судоў: як у раённым, так і ў Мінскім гарадскім. Калі ж Вярхоўны суд па сваёй ініцыятыве прыме крымінальную справу да сваёй вытворчасці, то ў такім выпадку Віктар Бабарыка будзе пазбаўлены права на апеляцыйнае абскарджанне прысуду, паколькі згодна з КПК прысуды Вярхоўнага суда не падлягаюць абскарджанню ў апеляцыйным парадку, — тлумачаць адвакаты.
Каб прадухіліць парушэнне права Віктара Бабарыкі на абскарджанне прысуду, яго абаронцы звярнуліся ў Вярхоўны суд з заявай, у якой просяць накіраваць справу для разгляду ў суд ніжэйшай інстанцыі.
— Права абвінавачанага абскардзіць прысуд прадугледжана артыкулам 43 КПК. Гэта права — адна з базавых гарантый справядлівага судовага разбору, устаноўлена Міжнародным пактам аб грамадзянскіх і палітычных правах (пункт 5 артыкула 14). Рэспубліка Беларусь з'яўляецца дзяржавай-удзельніцай Пакта і абавязаная добрасумленна выконваць гэты міжнародны дагавор. Такім чынам, выкананне гэтага стандарту справядлівага суда магчыма, толькі калі справа Віктара Бабарыкі будзе слухацца па першай інстанцыі ў адным з ніжэйстаячых судоў. Гэта дазволіць Віктару Бабарыку ў выпадку нязгоды з прысудам абскардзіць яго ў апеляцыйным парадку, — заяўляюць адвакаты.
