Каля крыжа ўначы з 2 на 3 ліпеня

Падчас урачыстасцей у Будславе перад Нацыянальным санктуарыем Маці Божай Будслаўскай быў выстаўлены крыж, выраблены з абгарэлых бэлек і фрагментаў медзі з даху святыні, знішчанага пажарам 11 мая.

Перад крыжам змешчана таблічка з надпісам: «Боль і ахвяра. Крыж зроблены з гістарычных абвугленых бэлек згарэлага даху Будслаўскай базылікі».

Побач знаходзіцца яшчэ адзін крыж з назваю «Памяць і ўдзячнасць», які да пажару захоўваўся за галоўным алтаром святыні. Ён быў зроблены ў 2007 годзе ў Вільні з гістарычных бэлек, знятых з даху віленскага кляштара айцоў бэрнардынаў, пабудаванага ў 1507 годзе побач з касцёлам святой Ганны.

Гэтыя бэлькі былі вычасаны з дрэваў, якія больш за пяцьсот гадоў таму раслі ў пушчы на берагах ракі Сэрвач, дзе манахі для іх нарыхтоўкі заснавалі паселішча з «будаў», гэта значыць буданоў, шалашоў — сённяшні Будслаў.

Бэрнардыны сплаўлялі драўніну па Сэрвачы і іншых рэчках у Вілію, а па ёй — у Вільню, дзе яе выкарыстоўвалі для будаўніцтва кляштара.

Падчас яго рэстаўрацыі на пачатку ХХІ стагоддзя частка бэлек была заменена, а з гістарычнага дрэва быў зроблены крыж, які ў гонар 500-годдзя Будслава на маторных лодках даставілі ў нацыянальны санктуарый.

Крыж з абвугленых бэлек з даху базылікі формай і памерамі паўтарае крыж, прывезены з Вільні.

Пілігрымы збіралі грошы на адбудову Будслава. Агульная лічба сабраных грошай набліжаецца да мільёна рублёў.

Чытайце таксама: Біскуп Буткевіч патлумачыў, які знак паслаў Беларусі Бог пажарам у Будславе

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру