Ілюстрацыйнае фота
Што адбываецца? Мы адрасавалі гэтае пытанне чыноўніку аднаго з аблвыканкамаў, ён выступіў ананімна.
У размове ён прызнаў, што дэфіцыт малака на ўнутраным рынку сапраўды ёсць. А таксама патлумачыў, чаму так.
«Калі мы кажам пра надоі, то сёлета праселі Гомельская і Віцебская вобласці, у астатніх усё больш-менш нармальна, ёсць рост.
То бок, з дэфіцытам сыравіны як такой праблема не звязаная, яна звязаная з нежаданнем беларускіх дзяржаўных вытворцаў працаваць на беларускім жа рынку», — лічыць чыноўнік.
«У Беларусі існуе біржа, дзе малако могуць прадаваць тыя калгасы, якія не маюць запазычнасцяў або сваіх унутрыраённых непаразуменняў з кіраўніцтвам выканкама.
І вось куды ідзе малако, рэалізаванае на біржы? Рэальнасць такая, што вытворцы ў Расію выгадней прадаваць на 25-30%.
Цяпер той, хто можа, імкнецца пастаўляць малако ў Расію, дзе няма рэгулявання цэнаў», — тлумачыць ён.
Фота ілюстрацыйнае
«Апошнія гады дзяржава дазваляла падымаць цэны продажу сыравіны на ўнутраны рынак, а перапрацоўшчыкам адпускныя цэны падымаць не давалі. У выніку — работа для тых прадпрыемстваў, якія працуюць на цэльнамалочцы, стала цяжкапрыбытковай. З замарозкамі цэн усё стала яшчэ горш. Усе імкнуцца хоць што зарабіць, як вынік — асірацелыя паліцы.
Што цікава, прыватныя вытворцы выдаюць на ўнутраны рынак свае звычайныя лічбы паставак, істотнай прасадкі не відаць — тое ж, што і год, два гады таму.
А вось дзяржаўныя прадпрыемствы ўсё гоняць на Расію — гэта да папулярнага аргумента, што «толькі дзяржава можа забяспечыць харчавую бяспеку»», — кажа функцыянер.
Пры гэтым яго прагноз такі: малако на паліцы вернецца, але цаной пагаршэння эканамічнага стану перапрацоўшчыкаў.
«Сітуацыя або працягнецца свабодна, як цяпер, або будзе заціснутая. Свабодна ў нас не робіцца, а значыць, будзем заціскаць і прымушаць адгружаць больш на ўнутраны рынак», — рэзюмуе ён.
Між тым, у нядзелю віцэ-прэм'ер Аляксандр Субоцін заявіў, што ўрад плануе скараціць спіс прадуктаў, на якія рэгулююцца кошты. Цяпер у пастанове Саўміна 62 пазіцыі, з іх плануюць пакінуць 17.
«Хлеб, малако, натуральнамалочную прадукцыю і гэтак далей», — сказаў Субоцін.
Чытайце таксама:
«Наступны год будзе яшчэ цяжэйшым». Чыноўнік і старшыня «калгаса» аналізуюць сельскагаспадарчую статыстыку і даюць прагнозы
Урад задумаўся аб увядзенні картак на ежу для незаможных
Што будзе з цэнамі на ежу і якія поспехі беларускай сельскай гаспадаркі
