Следчыя працуюць на месцы злачынства. Фота: прэс-служба СК

У судзе абвінавачаны расказваў, што не хацеў забіваць дзіця. Па яго словах, усё адбылося па неасцярожнасці. Казаў, што біў хлопчыка, каб той не чапаў небяспечныя прадметы, маўляў, не ўяўляў, што мог нанесці смяротныя траўмы далонню рукі, якой біў не ў поўную сілу. Так, кулакамі, айчым выхоўваў гадавалае дзіця. 

З моманту збіцця прайшло некалькі дзён. Як стала вядома ў судзе, абвінавачаны ўгаварыў сужыцельку, якая бачыла, што дзіця збітае, не звяртацца па медыцынскую дапамогу.

14 снежня 2020 года хлопчык памёр. Участковы доктар, якая вечарам таго дня прыехала да сям’і, расказала: сястра маці паведаміла медыкам, што патрэбная дапамога малому пляменніку. Аднак на месцы доктар убачыла: хлопчык ужо нежывы. Ягоная маці крычала сужыцелю, што той вінаваты ў смерці. 

Сама пацярпелая ў судзе расказала, што жыла з трыма дзецьмі і сужыцелем, які неадзнаразова заставаўся дома з яе малым сынам. Незадоўга да трагедыі мужчына выказваў пажаданні смерці хлопчыку, казаў пра ненавісць да яго. Суседзі гаварылі журналістам, што айчыма раздражняла, калі малы плакаў. 

Паводле экспертызы, смерць наступіла ад закрытай чэрапна-мазгавой траўмы, якая ўскладнілася ацёкам, сцісканнем і змяшчэннем галаўнога мозга. На целе дзіцяці былі шматлікія траўмы, з агляду вынікае, што абвінавачаны біў хлопчыка па галаве, грудзях і па жываце. У судзе абвінавачаны не адмаўляў, што 9 снежня, за пяць дзён да смерці, збіў дзіця. 

Псіхіятры правяралі стан самога абвінавачанага. У яго дыягнаставанае лёгкае псіхічнае расстройства, аднак ён мог усведамляць, што робіць і да якіх наступстваў гэта прывядзе. У момант здзяйснення злачынства ён быў цвярозы. Раней меў судзімасць, за парушэнне ўмоваў адбывання «хіміі», яму дадаткова далі паўтары гады зняволення. Выніковы прысуд — 21 год пазбаўлення свабоды, Вярхоўны суд пакінуў яго ў сіле.

Невядома, ці была прыцягнутая да адказнасці маці, якая пакінула малога сына з чалавекам, які выказваў нянавісць і пажаданні смерці малому, а таксама якая не звярнулася своечасова па медыцынскую дапамогу, каб выратаваць сына. Па справе аб забойстве яна праходзіла як пацярпелая. Жанчына не заяўляла патрабаванне аб пагашэнні матэрыяльнай ці маральнай шкоды.

Хочаш падзяліцца важнай інфармацыяй ананімна і канфідэнцыйна?