Ілюстрацыйнае фота
З самай раніцы 1 снежня па ўсёй Беларусі адбываюцца ператрусы. На гэты момант праваабаронцам «Вясны» вядома пра вобшукі ў мазырскага праваабаронцы Уладзіміра Целепуна, у актывістаў з Віцебска Уладзіміра Кійко і Мікалая Качурца, а таксама ў крычаўскага журналіста Сяргея Няроўнага. У Гомелі прыйшлі да журналісткі Ларысы Шчыраковай, а пасля ператрусу яе павезлі на допыт.
Акрамя гэтага, з 7 раніцы праходзяць ператрусы ў Мінску.
Па інфармацыі праваабаронцаў, з вобшукамі прыйшлі мінімум да 10 чалавек.
У прыватнасці прайшоў ператрус у гродзенскай журналісткі Надзеі Віцінай. Яна затрыманая як сведка «па нейкай справе, у якім фігуруе яе асабістая перапіска».
У Брэсце раніцай супрацоўнікі міліцыі прыйшлі да Алены Жушма.
Таксама вядома пра ператрус у рэчыцкага актывіста Алега Карбалевіча. Сілавікі забралі яго камп'ютар, а яго павезлі ў РАУС.
Сталі вядомыя падрабязнасці ператрусу ў мазырскага праваабаронцы Уладзіміра Целяпуна. Раніцай супрацоўнікі міліцыі правялі вобшук на лецішцы Уладзіміра, а цяпер паехалі на яго кватэру. Тэхніку пасля ператрусу не забіраюць, а толькі значкі «Вясны», кнігі, паштоўкі і плакаты.
Прадстаўнікі якога ведамства праводзяць ператрус — пакуль невядома.
Адбываецца ператрус у Васіля Палякова — гомельскага палітыка і грамадскага дзеяча АГП
Ператрус у журналісткі Ларысы Шчыраковай у Гомелі доўжыўся блізу 1,5 гадзін, яго правялі супрацоўнікі ДФР. У журналісткі забралі тэлефон, апаратуру, флэшкі і дыскі.
Пасля ператрусу яе дапыталі ў ДФР. Яна адмовілася адказваць на пытанні.
Шчыракову вусна папярэдзілі аб адказнасці за выдаванне матэрыялаў справы, таму падрабязнасці праваабаронцам яна не распавяла.
