Ксёндз Анджэй Бульчак. Фота: katolik.life
Падрабязнасці ад'езду ён расказаў у інтэрв’ю Вячаславу Барку, іншаму ксяндзу, які знаходзіцца ў эміграцыі.
Анджэй Бульчак, грамадзянін Польшчы, служыў у Беларусі 14 год.
29 сакавіка святар тэрмінова пакінуў Беларусь. На ксяндза Анджэя завялі адміністрацыйную справу за кароткае відэа, размешчанае на пачатку сакавіка на ютуб-канале, які разам з касцельнай моладдзю вёў святар.
У ролік з назвай «Ліст да полек і палякаў», у якім дзяўчына з Беларусі піша ліст палякам і тлумачыць, што людзі супраць вайны, бачнае лога «Белсат» і бела-чырвона-белыя сцягі. Гэта і стала падставай для завядзення адміністрацыйнай справы, якая так і не дайшла да суда — была адпраўленая на дапрацоўку.
«Калі ехалі з міліцыянерам у машыне, каб зрабіць арышт камп'ютара, я кажу яму: «Я да вас і ні да каго не маю ніякай крыўды і зла. Ведаю, што вы на сваёй працы, але можна і памяняць працу, каб жыць спакойна», — расказвае пра тыя падзеі ксёндз.
У сярэдзіне траўня павінен быў скончыцца дазвол на святарскае служэнне ксяндза Анджэя. У такіх умовах ён палічыў за лепшае з’ехаць з Беларусі, дзе прайшла палова яго святарскага жыцця. Таксама Анджэй Бульчак адзначыў, што не страчвае надзеі вярнуцца ў Паставы праз нейкі час.
«За вайной стаіць зло, Сатана, за дабром — Бог. Святар не можа стаяць на баку зла, вайны. Мы як святары не можам казаць: ай, мая хата з краю. Я надта моцна люблю беларусаў, Беларусь і касцёл, каб маўчаць. Не магу. Калі мы будзем маўчаць, і за словы будзем адказваць перад Богам, і за маўчанне таксама.
Не ваяваць з уладай, але ваяваць са злым духам, Сатаной, бо ён стаіць на баку вайны, а мы — слугі супакою, міру і згоды. Мы, ксяндзы, праваслаўныя святары, кожны хрысціянін — на баку дабра.
Папа Рымскі Ян Павел ІІ прыехаў у Польшчу, калі быў камунізм, і сказаў такія важныя словы: «Не бойцеся! Не бойцеся». Калі зразумеем сэнс гэтых слоў, дык не будзем баяцца, бо мы на баку дабра, а зло будзе крычаць, будзе нешта рабіць, але мы пераможам, бо Бог з намі».
Святары за кратамі — не сенсацыя для Беларусі: болей за паўтары гады знаходзіцца ў СІЗА праваслаўны айцец Сяргей Разановіч з Брэстчыны, да суда ў ізалятары знаходзіўся затрыманы за антываенны плакат грэка-каталіцкі святар Васіль Ягораў з Магілёва, затрыманы ксёндз з Лынтупаў Аляксандр Баран.
«Калі царква адмаўляецца падтрымліваць людзей у турмах, яна адварочваецца ад Хрыста». Шчырае інтэрв'ю з айцом Аляксандрам Шрамко
Архіепіскап Еўстрацій: Ідэі Пуціна — гэта не загадкавасць рускай душы, не варыянт нормы, а абсалютнае зло — такое ж, якім некалі быў нацызм
