З 24 лютага, калі Пуцін напаў на Украіну, сотні беларускіх добраахвотнікаў далучыліся да беларускага батальёна Кастуся Каліноўскага і іншых аналагічных фарміраванняў у складзе Узброеных сіл Украіны. Як кажуць кіраўнікі беларускай апазіцыі, яшчэ больш за тысячу добраахвотнікаў чакаюць разгляду іх заявак на ўваходжанне ў склад батальёна і адпаведнага навучання.

Іншае вайсковае фарміраванне, так званая «Свабода Расіі», зараз рыхтуецца да адпраўкі на фронт. Сярод яго членаў — былыя расійскія салдаты, што трапілі ў палон і перайшлі на іншы бок, а падтрымліваюць новы легіён уплывовыя лідары расійскай апазіцыі ў выгнанні, піша Wall Street Journal.

Павел Кулажанка, батальён Кастуся Каліноўскага. Фота: Wall Street Journal. 

Батальён Каліноўскага зараз складаецца прыкладна з 200 асоб: ад актывістаў і блогераў, якія не маюць баявога вопыту, да ветэранаў вайны на Данбасе. Сам батальён ужо ўдзельнічаў у баявых падзеях: ён дапамагаў абараняць Кіеў, горад, які расіяне так і не здолелі ўзяць за пяць тыдняў жорсткіх баёў.

Зараз ва Украіне фарміруецца і іншы беларускі батальён — «Пагоня», беларускія часткі таксама ёсць ва ўкраінскай тэрабароне, гарадах Адэса і Луцк.

Таксама актывісты ў Беларусі спальваюць абсталяванне на чыгунцы, якую выкарыстоўвае расійская армія, каб перапраўляць зброю і грузы на кіеўскі фронт.

Франак Вячорка, дарадца Святланы Ціханоўскай, тлумачыць для Wall Street Journal: тыя беларусы, што зараз змагаюцца ў шэрагах украінскай арміі, стануць асновай арміі новай Беларусі, калі рэжым Лукашэнкі падзе.

Хутка пасля пачатку вайны Уладзімір Зяленскі запрасіў добраахвотнікаў з усяго свету прыязджаць і змагацца за незалежнасць Украіны ў наваствораным Інтэрнацыянальным легіёне. Батальён «Пагоня» з’яўляецца яго часткай. Батальён Каліноўскага, наадварот, уваходзіць у рэгулярную ўкраінскую армію, нават мае ўласнага беларускага кіраўніка. На сёння трое салдат батальёна загінулі ў баі.

Рускія змагаюцца супраць рускіх

Беларускую апазіцыю ўжо доўга натхняў прыклад украінскага супраціву Расіі. А вось для расіян ідэя змагацца супраць уласных суайчыннікаў — нешта даволі новае.

Канстанцін Сунзік, батальён Кастуся Каліноўскага. Фота: Wall Street Journal

Пра фарміраванне «Свабода Расіі» стала вядома некалькі дзён таму, калі трое яго ўдзельнікаў выступілі на прэс-канферэнцыі ў Кіеве. Гэтыя мужчыны ў чорных балаклавах распавялі, што трапілі ва Украіну з расійскай арміяй, але потым апынуліся ў палоне і пачалі сумнявацца ў афіцыйнай расіяскай ідэалогіі. На канферэнцыі яны адмовіліся прад’яўляць нейкія доказы сваёй ранейшай службы ў расійскай арміі і не расказвалі дэтальна, у якіх вайсковых адзінках і ў якім рэгіёне Украіны ваявалі. Таксама гэтыя людзі не надта шмат распавядалі пра саму «Свабоду Расіі», але паведамілі, што ў яе склад уваходзяць, у тым ліку, беларускія салдаты.

Марат Гельман, расійскі апазіцыйны актывіст, кажа, што хаця расійскія добраахвотнікі на ўкраінскім баку і не выглядаюць як значная ваенная адзінка, іх палітычную важнасць цяжка пераацаніць. Гэтыя людзі, тлумачыць Гельман, даюць надзею, што калі вайна скончыцца і стане вядомым, што грамадзяне Расіі дапамагалі ўкраінцам змагацца з агрэсарам, гэта палегчыць будучы дыялог паміж рускімі і ўкраінцамі.

Што датычыцца Беларусі, то гэтая краіна зараз адчувае сур'ёзны рост уплыву Расіі. Сітуацыя пагоршылася пасля выбараў 2020 года, калі Лукашэнка жорстка задушыў масавыя пратэсты нязгодных з вынікамі выбараў.

Сяргей Бяспалаў, батальён Кастуся Каліноўскага. Фота: Wall Street Journal

Сяргей Бяспалаў — адзін з беларускіх добраахвотнікаў ва ўкраінскай арміі — з’ехаў з Беларусі ў 2020 годзе, калі некаторыя з яго сяброў былі затрыманыя за вулічныя пратэсты. Бяспалаў як журналіст і блогер, які кіруе некалькімі тэлеграм-каналамі, лічыў, што можа стаць наступнай цэллю.

Калі пачалася вайна, Бяспалаў знаходзіўся ў Кіеве. У тым хаосе, што адбываўся ў пачатку ўварвання, украінскія спецслужбы арыштавалі Бяспалава, бо падазравалі, што ён расійскі дыверсант. Каб даказаць ім, што гэта не так, Бяспалаў паказаў украінцам свае тэлеграм-каналы і тату «Стоп Лука».

Зараз Сяргей не толькі далучыўся да батальёна, але і дапамагае прыцягваць туды новых рэкрутаў. «Як толькі вызвалім Украіну, пойдзем вызваляць Мінск», — кажа ён.

«Наша Ніва» аднаўляе збор данатаў — падтрымаць проста

Чытайце таксама: 

Мэта Расіі нумар адзін: вось дзе пройдзе галоўная бітва вайны

Загінулы беларускі добраахвотнік працаваў дальнабойшчыкам у Польшчы і пакінуў працу, каб абараняць Украіну

Баец, медык, фонд Żyvi, FreeShop Partyzanka… Вялікі рэпартаж пра беларусаў, якія дапамагаюць Украіне

«Мы дакладна разумелі, што не выжывем». Беларускі добраахвотнік Дзяніс «Кіт» расказаў пра пекла пад Бучай

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру