У суботу — беларускі фестываль у Саўт-Рывэры 2

У суботу 23 ліпеня грамада амэрыканскіх беларусаў правядзе ў горадзе Саўт-Рывэр, штат Нью-Джэрзі, свой традыцыйны гадавы фэстываль.

Адбудзецца ён на засаджаным дрэвамі пляцы каля царквы сьв. Еўфрасіньні Полацкай, што ў юрысдыкцыі Канстантынопальскага патрыярхату. У праграме мастацкае часткі фэстывалю: народныя танцы, беларускія вершы, песьні, музыка. Праграму арганізавалі й правядуць яе Валянтын і Тацьцяна Дзямешчыкі, кіраўнікі царкоўнага хору, супольна з харэографам Вілай Саўчук.

А ў будынку Беларуска-Амэрыканскага Цэнтру, які стаіць побач царквы, пройдзе лятарэя. Будуць таксама працаваць бар і рэстаран. Наведнікі здолеюць пачаставацца нацыянальнымі стравамі, набыць сувэніры, беларускія кніжкі, сустрэцца зь сябрамі, пазнаёміцца з новымі. Надвор’е на суботу прадбачыцца сонечна гарачае, але заля будынку мае ахаладжальную сыстэму.

Янка Запруднік

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ