У Магілёве на акцыю маўклівага пратэсту прыйшлі каля 150 чалавек 1

Акцыя прайшла без апладысментаў. Затрыманняў не было.

Задоўга да 19 гадзін традыцыйнае месца правядзення акцый — сквер каля магазіна «Лявоніха» насупраць плошчы Леніна — быў ачэплены ўзмоцненымі нарадамі міліцыі. Міліцыянеры не дазвалялі праходзіць туды грамадзянам, не растлумачваючы прычын.

Удзельнікі акцыі вымушаныя былі збірацца непадалёк — каля аўтобуснага прыпынку «Беларуска-расійскі ўніверсітэт». Людзі стаялі, перамаўляючыся між сабой. Некаторыя вадзіцелі, што праязджалі міма, падавалі сігналы, уключалі песню Віктара Цоя «Перамен».

Бліжэй да заканчэння акцыі тры маладыя дзяўчыны пачалі гуляць у ладкі. Гэта выклікала рэакцыю маёра Цецерукова, які ў мегафон заявіў, што любое прыцягненне ўвагі да сябе будзе расцэнена як удзел у несанкцыянаванай акцыі.

Каля 19.40 прысутныя пачалі разыходзіцца. Затрыманняў не было. Тым не менш аўтобус, што выкарыстоўваецца міліцыяй для перавозкі затрыманых, на працягу ўсёй акцыі знаходзіўся побач.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ