Падчас учарашняй акцыі пратэсту ў Беларусі было затрымана 30 чалавек

Паводле звестак праваабаронцаў, 20 ліпеня падчас чарговай акцыі маўклівага пратэсту ў розных гарадах Беларусі было затрымана прыкладна 30 чалавек.

Апрача Мінска затрыманні праводзіліся ў Брэсце, Гродне, Белаазёрску, Наваполацку, Ваўкавыску.

У Мінску затрыманы 20 чалавек.

Як паведаміла праваабаронца Наста Лойка, іх даставілі ў РАУС Цэнтральнага раёна. Хутка двух непаўналетніх адпусцілі, адну дзяўчыну павезлі на машыне хуткай дапамогі ў клініку, 17 чалавек адправілі ў Цэнтр ізаляцыі правапарушальнікаў на Акрэсціна, дзе яны будуць знаходзіцца да суда. Сярод затрыманых — грамадзянка Расіі Анастасія Вярчанкова.

Справы павінны быць разгледжаны сёння ў судзе Цэнтральнага раёна Мінска.

Праваабаронцам пакуль невядома, якія абвінавачанні выставяць затрыманым.

Паводле інфармацыі праваабарончага сайта www.spring96.org,

больш як 10 чалавек былі затрыманы ўчора прыкладна ў 21.00 каля сталічнага клуба «6А».

Затрыманне праводзілі людзі ў цывільным. Афіцыйнай прычынай затрымання была названа неабходнасць праверкі на алкаголь. Затрыманыя былі дастаўлены ў Ленінскі РАУС. Ці складзены на іх пратаколы, праваабаронцам пакуль невядома.

Учарашняя акцыя маўклівага пратэсту, як і ўсе папярэднія, была арганізавана з ініцыятывы інтэрнэт-групы «Рэвалюцыя праз сацыяльныя сеткі». У Мінску арганізатары пасля інтэрнэт-галасавання вярнуліся да ранейшага месца правядзення акцыі — Кастрычніцкай плошчы. Апошнія два разы ўдзельнікі збіраліся ў цэнтральных пунктах раёнаў і каля буйных гандлёвых цэнтраў.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ