Да Новага года — 73 дні: Кандытарскія прадпрыемствы пачалі камплектаваць падарункі

Кандытарскія прадпрыемствы «Белдзяржхарчпрама» пачалі камплектаваць дзіцячыя навагоднія падарункі, паведамілі БелаПАН у прэс-службе канцэрна.

Усяго плануецца падрыхтаваць прыкладна 2 млн. навагодніх баулаў па цане ад 20 тыс. да 80–100 тыс. рублёў.

СААТ «Камунарка» выпусціць 1 млн. штук, СП ААТ «Спартак»- 750 тыс. На «Спартаку» ўжо сабралі 93 тыс. падарункаў, на «Камунарцы»- 205 тыс.

ААТ «Чырвоны харчавік» падрыхтуе да Новага года 16 тыс. падарункаў, ААТ «Кандытарская фабрыка «Слодыч» — 45 тыс. Яны пачнуць камплектаваць навагоднія баулы ў канцы кастрычніка. ААТ «Чырвоны мазыранін» выпусціць 15 тыс. падарункаў. Іх камплектацыя пачнецца ў лістападзе.

Як адзначылі ў прэс-службе, паводле традыцыі многія навагоднія падарункі будуць аформлены з сімволікай наступнага года (год Дракона па ўсходнім календары). У кожнага прадпрыемства ёсць навінкі — незвычайныя каробкі-ўпакоўкі, мяккія цацкі і інш.

Навагоднія падарункі камплектуюцца ўручную, для чаго на прадпрыемствах фарміруюць спецыяльныя брыгады са спрактыкаваных майстроў. Улічваючы вялікі аб’ём працы, некаторыя прадпрыемствы пачынаюць камплектаваць падарункі з кастрычніка. Тэрмін захоўвання шакаладных цукерак звычайна складае шэсць-дзевяць месяцаў.

Першыя партыі навагодніх падарункаў паступяць у продаж ужо ў канцы кастрычніка.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ