У Гродзенскай вобласці ДАІ ўсталюе расцяжкі на англійскай мове + фота 7

Гродзенская дзяржаўтаінспекцыя распрацавала эскізы расцяжак на англійскай мове. На расцяжках па-англійску напісана: «На Гродзеншчыне ліхачоў пазбаўляюць правоў. Адназначна».

Пра гэта паведамляе прэс-служба дзяржаўтаінспекцыі (ДАІ) Гродзенскай вобласці. Паводле гэтага паведамлення, плануецца, што новыя расцяжкі з’явяцца на беларуска-польскай і беларуска-літоўскай межах, у тым ліку каля мытнага пункта пропуску «Каменны Лог» Ашмянскага раёна і каля мытнага пункта пропуску «Катлоўка» Астравецкага раёна.

Таксама расцяжкі павінны быць устаноўленыя каля мытных пунктаў «Пагранічны» Бераставіцкага раёна, «Брузгі» і «Прывалка» Гродзенскага раёна і «Беняконі» Воранаўскага раёна.

Прэс-служба ДАІ Гродзенскай вобласці паведамляе: на дарогах вобласці ў 2011 годзе загінулі 140 чалавек. 40 з іх — падчас дарожна-транспартных здарэнняў, якія адбыліся з удзелам замежных кіроўцаў.

Гродзенская дзяржаўтаінспекцыя звяртаецца да чытачоў сайта gaigrodno.by з прапановай выказаць сваё меркаванне пра новыя расцяжкі на англійскай мове.

Варта з прыкрасцю адзначыць, што гродзенскае ДАІ ўжывае па-ангельску русіфікаваны варыянт назвы Гродна, а не дзяржаўны стандарт транслітэрацыі назваў геаграфічных пунктаў з беларускай мовы.

Сяргей Зянько, Рэгіянальная газета; СГ

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ