Міністр архітэктуры наведвае Венесуэлу і Эквадор 1

Беларуская дэлегацыя на чале з міністрам архітэктуры і будаўніцтва Анатолем Нічкасавым 23–30 жніўня наведвае з візітам Венесуэлу і Эквадор.

Як паведаміла прэс-служба МЗС Беларусі, у Венесуэле дэлегацыя правядзе сустрэчы з кіраўніцтвам МЗС, а таксама міністэрстваў прамысловасці, нафты і гарнаруднай прамысловасці, жылля і жылой інфраструктуры.

Візіт у Эквадор прадугледжвае перамовы з кіраўніцтвам Адміністрацыі прэзідэнта, МЗС, міністэрстваў гарадскога развіцця і жыллёвай гаспадаркі.

Асаблівая ўвага падчас паездкі «будзе нададзена рэалізацыі дамоўленасцей, дасягнутых у ходзе візіту Аляксандра Лукашэнкі ў гэтыя краіны», паведамляе прэс-служба МЗС.

Трэба адзначыць, што гэтымі днямі ў Эквадоры вырашаецца пытанне аб экстрадыцыі на радзіму былога беларускага міліцыянера Аляксандра Баранкова, які паехаў у гэтую краіну ў кастрычніку 2009 года, а летам 2010-га атрымаў статус палітбежанца.

У Беларусі Баранкоў абвінавачваецца ў махлярстве, падбухторванні да дачы хабару і хабарніцтве. Сам ён сцвярджае, што ў яго ёсць доказы ўдзелу высокапастаўленых беларускіх чыноўнікаў, у тым ліку сваякоў Аляксандра Лукашэнкі, у кантрабандзе нафтапрадуктаў. У чэрвені гэтага года Баранкоў быў затрыманы на падставе запыту беларускага боку аб экстрадыцыі.

Адвакат Баранкова сцвярджае, што справа палітбежанца прыняла новы абарот пасля візіту ў Эквадор у чэрвені гэтага года Аляксандра Лукашэнкі. Аднак днямі прэзідэнт Эквадора Рафаэль Карэа заявіў, што затрыманне Баранкова не было праведзена, каб дагадзіць Лукашэнку. Карэа таксама заявіў, што яго паўнамоцтвы дазваляюць адмовіць у экстрадыцыі, нават калі суд прыме рашэнне вярнуць Баранкова на радзіму. Разам з тым Карэа адзначыў, што лічыць за лепшае не выказваць свайго стаўлення да гэтай справы да рашэння суда.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ