 |
Юшчанка, які сядзеў за сталом у прэс‑цэнтры сакратарыяту прэзыдэнта, паведаміў, што падпісаў новы ўказ, якім прызначыў іншую дату датэрміновых парлямэнцкіх выбараў — 24 чэрвеня.
Ён па сутнасьці прызнаў пасьпяховасьць тактыкі кааліцыі, якая палягала ў байкатаваньні ягонага папярэдняга рашэньня.
Юшчанка расказаў, што «ўзяў да ўвагі» заяву Цэнтрвыбаркаму пра адсутнасьць кворуму на іхніх пасяджэньнях, што зрабіла немагчымай падрыхтоўку да выбараў 27 траўня.
— Я давёў да прэм’ер‑міністра Ўкраіны сваю рэзкую ўстурбаванасьць фактычнай адмоваю Кабінэту міністраў забясьпечыць фінансаваньне вашага волевыяўленьня. Гэта ўчынак, які мяжуе з парушэньнем крымінальнага закону, — паведаміў Юшчанка з тэлеэкранаў у звароце да грамадзянаў.
Далей Юшчанка нагадаў, што мінуў ужо месяц, як у Вярхоўнай Радзе была перафарматаваная кааліцыя, калі да яе на індывідуальных падставах далучылася група прадстаўнікоў апазыцыі.
Гэта, паводле слоў Юшчанкі, супярэчыць нормам Канстытуцыі, што кааліцыя ствараюць толькі фракцыі.
— Цяпер прэзыдэнт Украіны ў поўнай меры можа рэалізаваць сваё права распусьціць парлямэнт на падставе артыкулу 90 Канстытуцыі Ўкраіны, — сказаў Юшчанка. — Я падпісваю ўказ пра прызначэньне пазачарговых выбараў Вярхоўнай Рады Ўкраіны на 24 чэрвеня 2007 году.
Раней прадстаўнікі апазыцыі абураліся, што Юшчанка ў першым указе не спасылаўся на 90‑ы артыкул, дзе выкладзеныя падставы роспуску парлямэнту.
Зрэшты, на момант напісаньня гэтых радкоў сам тэкст указу на сайце кіраўніка дзяржавы не зьявіўся.
Таму можна толькі меркаваць, што ў дакумэнце пазначаныя новыя падставы для роспуску парлямэнту.
Калі насамрэч так, то Юшчанка разьвязаў для сябе праблему з Канстытуцыйным судом, пабойвацца рашэньня якога ў прэзыдэнта былі ўсе падставы.
Пра тое, што сваім указам Юшчанка ня проста перанёс дату выбараў, але і па‑сутнасьці другі раз распусьціў парлямэнт, сьведчыць і дата новага галасаваньня — 24 чэрвеня. Гэта акурат 60‑ы дзень, калі лічыць ад 25 красавіка.
А, як вядома, па Канстытуцыі датэрміновыя выбары праводзяцца цягам 60 дзён пасьля прыпыненьня паўнамоцтваў папярэдняга парлямэнту.
Новы ўказ, відавочна, будзе выдадзены наўзамен старога, а таму ў Канстытуцыйным судзе давядзецца закрыць разгляд справы, якую яны слухалі цягам апошніх васьмі дзён. Тым самым дзеяньні Юшчанкі дазволяць «абнуліць» сытуацыю ў КС.
Цяпер, нават калі кааліцыя захоча абскардзіць указ прэзыдэнта ў Канстытуцыйным судзе, іх ня будзе чакаць паўтор такога трыюмфальнага разгляду пытаньня, які адбываецца пад кіраўніцтвам Сюзаны Станік.
Па сутнасьці новы ўказ ёсьць крахам гэтай жанчыны. Яго разгляд у Канстытуцыйным судзе будзе вымагаць абраньня новага дакладчыка. А, улічваючы гісторыю з спадарыняй Станік, другі раз ня ўдасца паўтарыць маніпуляцыі, якія фактычна аддалі справу ў патрэбныя для кааліцыі рукі.
Адначасова, цяпер зьяўляюцца й іншыя рызыкі — што дакладчыкам стане судзьдзя, ангажаваны на карысьць Юшчанкі.
Яшчэ адзін нюанс, які зьвяртае на сябе ўвагу, — указ прэзыдэнта зьявіўся ў момант, калі Януковіч знаходзіўся ва Ўзбэкістане. Нават экстранае вяртаньне з гэтай сярэднеазіяцкай краіны зойме як найменей паўсутак, цягам якіх кааліцыя ня зможа нармальна выпрацаваць тактыку дзеяньняў у новых умовах.
Фота прэс-службы прэзыдэнта Ўкраіны
